Twenty Five Twenty One

၁၉၉၈ ခုနှစ်မှာ အိပ်မက်တွေနဲ့ အလှမ်းဝေးနေတဲ့ ဓားသိုင်းကစားသမား မိန်းကလေးတစ်ယောက်ဟာ ကြီးမားတဲ့ သူ့ရဲ့ရည်မှန်းချက်နောက်ကို လိုက်ရင်း ဘဝကို ပြန်လည်တည်ဆောက်ဖို့ ကြိုးစားနေတဲ့ လူငယ်လေးတစ်ယောက်နဲ့ တွေ့ဆုံဖို့ ဖြစ်လာပါတော့တယ်။ အသက် ၂၂ နှစ် နဲ့ ၁၈ နှစ်မှာ စတွေ့ခဲ့တဲ့ လူနှစ်ယောက်က ၃ နှစ်ကြာပြီးနောက် အသက် ၂၅ နှစ် နဲ့ ၂၁ နှစ်ကို ရောက်တဲ့အချိန် သူတို့နှစ်ဦးရဲ့ဘဝမှာ ဘာတွေ ဘယ်လို ပြောင်းလဲသွားမလဲ။ အဓိက ဇာတ်ကောင်မင်းသမီး နာဟီဒိုကတော့ အထက်တန်းကျောင်းတစ်ကျောင်းရဲ့ ဓားသိုင်းအဖွဲ့ဝင်တစ်ယောက်ပါ။ တောင်ကိုရီးယား စီးပွားရေးကပ်ဆိုက်မှုကြောင့် အဲ့ဒီအထက်တန်းကျောင်းက ဓားသိုင်းအသင်းကို ဖျက်သိမ်းလိုက်ရပေမဲ့ သူမဟာ သူမရင်ဆိုင်နေရတဲ့ အခက်အခဲတွေကို ထိပ်တိုက်ရင်ဆိုင်ပြီး ရေကုန်ရေခမ်း ကြိုးစားကျော်လွှားခဲ့ပါတယ်။ ငယ်ရွယ်တဲ့လူငယ်ဘဝမှာ ကြိုးစားဖို့ အခွင့်ရှိတုန်းလေး စိတ်အားထက်သန်စွာနဲ့ သူမရဲ့ရည်မှန်းချက်ဆီ ဘယ်လိုလျှောက်လှမ်းခဲ့လဲဆိုတာကို အတုယူစရာပုံရိပ်မျိုးနဲ့ ကြည့်ရှုရမှာပါ။ တစ်ဖက်မှာလည်း တောင်ကိုရီးယားစီးပွားရေး ကပ်ဆိုက်မှုကြောင့် အဓိက ဇာတ်ကောင်မင်းသား ဘဲ့ဂီဂျင်း အဖေရဲ့ စီးပွားရေးလုပ်ငန်းက ဒေဝါလီခံခဲ့ရတယ်။ ဒီလိုနဲ့ပဲ ဘဲ့ဂီဂျင်းရဲ့ ဘဝက သူဌေးသားအဖြစ်ကနေ ဘာမှ မပိုင်ဆိုင်တော့တဲ့ ဆင်းရဲသားတစ်ယောက် အဖြစ် ပြောင်းလဲသွားခဲ့တယ်။ အချိန်ပိုင်းအလုပ်တွေကို ပြင်းပြင်းထန်ထန် လုပ်ရင်း ကိုယ်ကြုံတွေ့နေရတဲ့လောကဓံကို ကြံ့ကြံ့ခံကာ ဘဝကို ဘယ်လိုစိတ်ဓာတ်မျိုးနဲ့ ကြိုးစားရပ်တည်နေလဲဆိုတာကို မင်းသားချောလေးကို ကြည့်ရှုရင်း ဘဝသင်ခန်းစာကို တစ်ပါတည်း ရယူနိုင်မှာ ဖြစ်ပါတယ်။ ဒီဇာတ်လမ်းလေးထဲမှာ လူငယ်တွေရဲ့ ချစ်ခင်ရင်းနှီးမှုတွေ၊ ချစ်ခြင်းမေတ္တာကြားမှာရှိတဲ့ စိတ်လှုပ်ရှားမှု နဲ့အတူ လူရယ်လို့ ဖြစ်လာရင် မဖြစ်မနေ ကြုံတွေ့ရနိုင်တဲ့ အခက်အခဲတွေကို သဘာဝကျကျ၊ လက်တွေ့ဆန်စွာဖြင့် လွမ်းမောဖွယ်ရာ ကြည့်ရှုရမှာဖြစ်ပါတယ်။ ဒီဇာတ်ကားလေးကို ကြည့်ရုံနဲ့ ယူတတ်ရင် အများကြီးရရှိနိုင်တဲ့ အတုယူစရာတွေ၊ ဘဝသင်ခန်းစာတွေကို ကိုယ့်လက်တွေ့ဘဝမှာပါ ပြန်လည်အသုံးချနိုင်တဲ့အထိ အချိန်ကုန်ရကျိူးနပ်စေမယ့် ရလဒ်မျိုးကိုပါ ဒီကိုရီးယားဇာတ်လမ်းတွဲလေးက ပေးစွမ်းသွားမှာဖြစ်ပါတယ်။