The Sound of Magic: Season 1

ယခုတစ်ခေါက် တင်ဆင်ပေးမှာကတော့ “The Sound of Magic” လို့ အမည်ရတဲ့ စုစုပေါင်း အပိုင်း ခြောက်ပိုင်းပဲ ပါဝင်တဲ့ ဇာတ်လမ်းလေးပဲဖြစ်ပါတယ်။ ဒီဇာတ်လမ်းရဲ့ စိတ်ဝင်စားဖွယ်အချက်ကတော့ Itaewon Class ကို ရိုက်ကူးထားတဲ့ ဒါရိုက်တာ Kim Sun Yoon ကပဲ ဖန်တီးထားတာဖြစ်တဲ့အပြင် နာမည်ကြီး သရုပ်ဆောင်တွေဖြစ်ကြတဲ့ Ji Chang Wook, Choi Sung Eun နဲ့ True beauty ဇာတ်ကားထဲမှ Hwang In Youp တို့က ပါဝင်သရုပ်ဆောင်ထားတာပါ။ ဒါ့အပြင် “The Sound of Magic” ဇာတ်ကားဟာ ကိုရီးယား ဂီတရုပ်ရှင်စီးရီး အမျိုးအစားဖြစ်ပါတယ်။ ဒါပေမဲ့ Dream High တို့လို အိုင်ဒေါလ်တွေနဲ့ ဖျော်ဖြေ တင်ဆက်တာမျိုး မဟုတ်ဘဲ La La Land လို ဇာတ်ကားမျိုးတွေကို အမှတ်ရသွားစေနိုင်တဲ့ ဂီတရုပ်ရှင်အမျိုးအစားပါ။

ဇာတ်လမ်းလေးရဲ့အကျဉ်းချုပ်ကတော့ ~
ယွန်းအာရီ (Choi Sung Eun) ဆိုတဲ့ ကျောင်းသူလေးဟာ အသက်ငယ်ငယ်ရွယ်ရွယ်နဲ့ မိသားစုရဲ့ ငွေကြေးဆိုင်ရာ ပြဿနာတွေကို ရင်ဆိုင်ဖြေရှင်းနေရတဲ့သူပါ။ ကျောင်းမှာလည်း ကျောင်းရဲ့ အတော်ဆုံးကျောင်းသား ဖြစ်တဲ့အပြင် မိဘတွေရဲ့ ထောက်ပံ့မှုအပြည့်အဝရထားတဲ့ နာအီဒင်း( Hwang In Youp) နဲ့ ဘေးချင်းကပ်ရပ် ထိုင်ရပြန်ပါတယ်။ အာရီဟာ လောကကြီးမှာ ရှင်သန်နေရတာ သူ့အတွက် ပင်ပန်းနေတဲ့အချိန်မှာ “မှော်ပညာကို ယုံကြည်ပါသလား” ဆိုပြီး ‌မေးတတ်တဲ့ မှော်ဆရာ ရီအူး(Ji Chang Wook) နဲ့ တွေ့ဆုံဖို့ ဖြစ်လာခဲ့ပါတယ်။ သူအစကတော့ အဲဒီထူးဆန်းတဲ့ မှော်ဆရာကို မယုံကြည်ပေမဲ့ သူ့ခက်ခဲဆင်းရဲတဲ့ လောကကြီးဆီကို ခဏလောက်ပဲဖြစ်ဖြစ် မေ့သွားနိုင်ပြီး ပျော်ရွှင်အောင်လုပ်ပေးနိုင်တဲ့ မှော်ပညာကို သူစပြီး ယုံကြည်လာတဲ့အခါမှာတော့ သူ မှော်ပညာကို မှော်ဆရာ ရီအူးထံမှာ သင်ယူဖို့ဖြစ်လာပါတော့တယ်။ အာရီ ယုံကြည်မိလိုက်တဲ့ မှော်ဆရာက တကယ်ပဲ စစ်မှန်တဲ့ မှော်ဆရာဟုတ်ရဲ့လား…သူ့ရဲ့ဘဝမှာဘာတွေ ထပ်ပြီး ကြုံတွေ့လာရဦးမှာလဲဆိုတာကိုတော့…အားလုံးပဲ ဒီဇာတ်လမ်းလေးမှာ ကြည့်ရှုခံစားပေးကြပါဦး..