လူသားမျိုးနွယ်တွေရဲ့ငြိမ်းချမ်းလုံခြုံမှုနဲ့ လွတ်လပ်ခြင်းတွေကို ကာကွယ်ပေးနေတဲ့ နံရံကြီးသုံးခုထဲက တစ်ခုဟာဆိုရင် ဧရာမလူ့ဘီလူးကြီးရဲ့ လက်ချက်နဲ့ ပျက်စီးသွားရတော့မှာကို အတွဲ ၁ မှာ မြင်တွေ့ရမှာပဲဖြစ်ပါတယ်။ နံရံတွင်းထဲမှာ သာမန်ဘဝနဲ့သာ ရောင့်ရဲတင်းတိမ်နေကြတဲ့ အပူအပင်မဲ့လူသားတွေဟာ သူတို့မမျှော်လင့်ထားခဲ့တဲ့ကပ်ဆိုးကြီးကို နဖူးတွေ့ ဒူးတွေ့ ကြုံရတဲ့အခါမှာတော့ ငရဲနဲ့ ဝဋ်ကြွေးရဲ့ဒဏ်ကို ဘယ်လိုမျိုးအလူးအလဲခံစားရတော့မှာလဲ၊ နံရံတွင်းက လူသားတွေရဲ့လောကကြီး မှောင်မိုက်သွားတဲ့အခိုက်အတန့်မှာ ကလေးသာသာပဲ ရှိသေးတဲ့ ကောင်လေး ‘အဲရမ်’ရဲ့အစားထိုးလို့မရတဲ့အရာကိုလည်း တစ်ပါတည်း ဆုံးရှုံးသွားရပါတော့တယ်။ နဂိုကတည်းက စိတ်လိုက်မာန်ပါ နိုင်လွန်းတဲ့အဲရမ်လေးက သူဆုံးရှုံးသွားရတဲ့အရာအတွက် အရွယ်နဲ့မလိုက်အောင် စိတ်ခံစားချက်တွေက တောက်လောင်လာတဲ့အချိန်မှာတော့ ငရဲတမျှဆိုးဝါးနေတဲ့လူသားတွေရဲ့ကမ္ဘာမှာ ဘယ်လိုအပြောင်းအလဲတွေ ဖြစ်လာမှာလဲဆိုတာကို အသည်းတယားယားနဲ့ ခံစားကြည့်ရှုရမှာပဲ ဖြစ်ပါတယ်။