White Snake 2: Green Snake

ဒီတရုတ်ကာတွန်းကားလေးကတော့ ၂၀၁၉ တုန်းက ထွက်ခဲ့တဲ့ White Snake ဇာတ်ကားရဲ့ ဒုတိယကား အဆက်ပါ။ ဒီဇာတ်ကားဟာလည်း ပထမကားလိုပဲ အတော်လေး ကောင်းမွန်တဲ့ ကာတွန်းကားလေးပါ။ ဒါပေမဲ့ တစ်ခုရှိတာက မြွေဖြူမလေး ပိုင်စုကျန်းရဲ့ အကြောင်း မသိထားတဲ့သူတွေအနေနဲ့ ဒီဒုတိယကားကို ကြည့်လိုက်ရင် ပထမကားနဲ့ ဒုတိယကားအကြားမှာ ပျောက်နေတဲ့ဇာတ်ကြောင်းကို နားမလည်သလို ဖြစ်နေမှာပါ။ ဒါကြောင့်ပဲ ကျွန်တော်က အကျဉ်းချုံးလေး ကြိုပြောပြပါရစေ။ ပထမကားရဲ့ နောက်ဆုံးအခန်းမှာ သူ့ရဲ့ ချစ်သူ အားရွှမ်းရဲ့ လူဝင်စားဖြစ်သူကို ပြန်တွေ့သွားပြီးတဲ့နောက်မှာ သူနဲ့ လူဝင်စား အားရွှမ်းဟာ ပြန်လည် ချစ်ကြိုက်ပြီး ကလေးတစ်ယောက်တောင် ရသွားခဲ့ပါသေးတယ်။ ဒါပေမဲ့ လူနဲ့ မိစ္ဆာဟာ အတူတူ နေလို့လည်း မရဘူး၊ အတူတူ ပေါင်းစည်းလို့လည်း မရဘူးလို့ ခံယူထားတဲ့ ဘုန်းကြီး ဖားဟိုင်ဟာ သူတို့နှစ်ယောက်ကို ခွဲဖို့ နည်းမျိုးစုံနဲ့ ချော့တလှည့် ခြောက်တလှည့် ကြိုးစားပါတော့တယ်။ နောက်ဆုံးမှာတော့ ဘုန်းကြီး ဖားဟိုင်က မြွေဖြူမလေး ရှောင်ပိုင်နဲ့ မြွေစိမ်းမလေး ရှောင်ချင်းတို့ထက် စွမ်းအားကြီးတာကြောင့် လူဝင်စား အားရွှမ်းက သူ့လက်ထဲ ရောက်သွားပြီး ဘုန်းကြီး ဝတ်လိုက်ရပါတယ်။ အဲ့ဒါကြောင့်ပဲ ဒီဒုတိယကားအစမှာ ရှောင်ပိုင်နဲ့ ရှောင်ချင်းတို့က အားရွှမ်းကို ပြန်လာ ကယ်ကြခြင်း ဖြစ်ပါတယ်။ ဒီလိုနဲ့ ဖားဟိုင်နဲ့ ယှဉ်တိုက်ရာမှာ ရှုံးနိမ့်သွားပြီး ရှောင်ပိုင်မှာ လေဖုန်းမျှော်စင်ထဲ အပိတ်ခံလိုက်ရပါတော့တယ်။ ပြောရရင် ဒီဇာတ်ကားက အရင်ဇာတ်ကားတွေနဲ့ မတူဘဲ ဒီနေရာက ဇာတ်ကြောင်းအသစ် ပြန်စပါတယ်။ ဒါကြောင့်ပဲ ရှောင်ချင်းဟာ သူ့အစ်မကို ကယ်ဖို့ ဖားဟိုင်နဲ့ တိုက်ရင်း ရှိုးလော်မြို့လို့ ခေါ်တဲ့ မြို့ပျက်ကြီးတစ်ခုထဲကို ရောက်သွားပါတယ်။ အဲ့မြို့ပျက်ကြီးထဲကနေ လွတ်မြောက်ဖို့ ကြိုးစားရင်း သူ့အစ်မဖြစ်သူကို ပြန်ကယ်နိုင်ပါ့မလားဆိုတာကိုတော့ ပရိသတ်ကြီးကိုယ်တိုင်ပဲ ကြည့်ရှုခံစားလိုက်ပါ။ ပြောရရင် ဒီတစ်ကားက မြွေစိမ်းမလေး ရှောင်ချင်းရဲ့ ဇာတ်ကားပါပဲ။ အရင်က ဇာတ်ကားတွေနဲ့ မတူဘဲ ဇာတ်ကြောင်းအသစ်ခင်းပြီး ရိုက်ထားတဲ့ ကားလေးမို့ မကြည့်ရသေးရင် ကြည့်ဖြစ်အောင် ကြည့်ဖို့ တိုက်တွန်းလိုက်ပါရစေ။