Weathering with You

Weathering with you
ဒီတစ်ခါတော့ IMDb Rating 7.5 ထိရရှိထားတဲ့ 2019 ခုနှစ်ရဲ့ ဂျပန် animation ကောင်းလေးတစ်ပုဒ်ကို မိတ်ဆက်ပေးပါမယ်။ ဇာတ်ဝင် သီချင်းလေးတွေကအစ အကုန်နားထောင်လို့ကောင်းပြီး ကြည့်ရှူသူတွေရဲ့စိတ်ကို တစ်မျိုးတစ်ဖုံခံစားရစေမှာပါ။

အညွှန်း~
‘ဟိုဒခါ’ လို့နာမည်ရတဲ့ ၁၆ နှစ်အရွယ်ကောင်လေးဟာ စိတ်လိုက်မာန်ပါနိုင်လွန်းတဲ့အိမ်ပြေးလေးတစ်ယောက်ပါ။ ဟိုဒခါဟာ သူ့ရဲ့‌နေအိမ်ရှိတဲ့ အရပ်ကနေ တိုကျိုမြို့ကို ထွက်ပြေးလာခဲ့တဲ့အချိန်မှာ မရပ်မနားသည်းထန်စွာရွာသွန်းနေတဲ့မိုးနဲ့ ကြုံပါတော့တယ်။ မိုးကမရပ်မနားရွာလွန်းလို့ တိုကျိုမြို့မှာရှိတဲ့လူတွေက နေရောင်ကို တော်တော့်ကို တောင့်တနေကြပါတယ်။ အဲဒီအချိန်မှာရာသီဥတုကို ထိန်းချုပ်နိုင်တဲ့မိန်းကလေး ‘ဟိန’ ကပေါ်ထွက်လာပြီး မိုးရွာနေတဲ့ရပ်ဝန်းကို နေရောင်ခြည်ကျရောက်လာအောင် ဆုတောင်းပေးပါတယ်။ ဒါပေမယ့် အဲ့လိုမျိုး ထိန်းချုပ် ဆုတောင်းပါများလာရင် နောက်ဆက်တွဲအကျိုးဆက်အနေနဲ့ ပြန်ပေးဆပ်ရမှာ ရှိပါတယ်။ အဲဒီမတိုင်ခင်မှာ ဟိုဒခါနဲ့ ဟိနတို့ဟာ မထင်မှတ်ဘဲ တွေ့ဆုံပြီး ချစ်ခြင်းမေတ္တာရဲ့ဆန်းကြယ်တဲ့အလှည့်အပြောင်းလေးဖြစ်ပေါ်လာပါတယ်။ ကမ္ဘာကြီးက ဘယ်တော့မှလူ့အလိုကိုလိုက်လည်းမရှိဘဲ သူထင်ရာလုပ်တဲ့အတွက် လူသားတွေကြုံတွေ့ရမယ့်ရေဘေးကို ဟိနက သူ့ကိုယ်သူဘယ်လိုပေးဆပ်ပြီး စတေးခံမှာလဲဆိုတာရယ်၊ ဟိန အပေါ် မေတ္တာသက်ဝင်သွားတဲ့ ဟိုဒခါကရော အဲ့လိုအခြေအနေကနေ ဟိနကို ဘယ်လိုကယ်ထုတ်ပေးမလဲဆိုတာ စိတ်ဝင်စားဖွယ် ကြည့်ရှူ ခံစားရမှာပဲဖြစ်ပါတယ်။