Troll

နော်ဝေးပြည်ရဲ့ ဒဏ္ဍာရီတွေထဲမှာ ထရိုးလို့ခေါ်တဲ့ ကျောက်ဘီလူးတွေရှိတယ်။ အရွယ်ရောက်ပြီးသား ကျောက်ဘီလူးတွေဟာ ခန္ဓာကိုယ်က တောင်လောက်ကြီးမားတယ်၊ ခရစ်ယာန်တွေရဲ့ သွေးကို အနံ့ခံနိုင်တယ်၊ အမှောင်ထဲကနေလာပြီး အလင်းရောင်အောက်မှာ သေကြတယ်၊ နေရောင်ခြည်နဲ့ထိရင် ကျောက်ဖြစ်သွားတတ်တယ်တဲ့။ နိုရာရဲ့ အဖေဖြစ်သူ တိုဘီယပ်စ်ဟာ ရိုးရာပုံပြင်ပညာရှင်ဖြစ်ပြီး ကျောက်ဘီလူးတွေရဲ့ ဒဏ္ဍာရီကို အရူးအမူးစိတ်ဝင်စားကာ ကျောက်ဘီလူးတွေကိုလည်း တကယ်ရှိတယ်လို့ ယုံကြည်တဲ့သူဖြစ်ပါတယ်။ အဲ့ဒီ ယုံကြည်မှုက အစွန်းရောက်လွန်းသွားတဲ့အတွက် သူဟာ လောကကြီးထဲကနေ ကွယ်ပျောက်နေရတဲ့သူဖြစ်ပါတယ်။ နိုရာကတော့ ရုပ်ကြွင်းဗေဒပညာရှင် တစ်ယောက်ဖြစ်ပါတယ်ဗျ။ တစ်နေ့မှာတော့ ဆောက်လုပ်ရေးအဖွဲ့တစ်ဖွဲ့ဟာ ရထားလမ်းဖောက်ဖို့အတွက် တောင်တစ်တောင်ကို ဖြိုရင်း ငလျင်တစ်ခုလှုပ်ခတ်ကာ မြေပြင်မှာ ထူးဆန်းတဲ့ ခြေရာပုံစံ ဧရာမချိုင့်ခွက်တွေ ပေါ်လာခဲ့ပါတယ်။ အဲ့ဒီချိုင့်ခွက်တွေအတွက် အဖြေရှာမရတဲ့ အာဏာပိုင်တွေဟာ ရုပ်ကြွင်းပညာရှင် နိုရာကို ခေါ်ပြီး စုံစမ်းအဖြေရှာခိုင်းခဲ့ရာကနေ ကျောက်ဘီလူးတွေနဲ့ ပတ်သက်နေတဲ့ လျှို့ဝှက်ချက်တွေဟာ ကမ္ဘာကြီးထဲကို တဖန်ပြန်ပေါ်လာခဲ့ပါတယ်ဗျ။ ဒီ Troll ဆိုတဲ့ နော်ဝေးရုပ်ရှင်ဟာဆိုရင် အရည်အသွေး မညံ့လှတဲ့ အထူးပြုလုပ်ချက်တွေနဲ့ စိတ်ဝင်စားဖို့ကောင်းတဲ့ဇာတ်လမ်းတစ်ခုကို ခင်းပြထားတဲ့ ရုပ်ရှင်ကောင်းတစ်ပုဒ်ပဲဖြစ်ပါတယ်…။