The Gangster, the Cop, the Devil

အခုတင်ဆက်ပေးချင်တာကတော့ ၂၀၁၉ ခုနှစ်တုန်းက ထွက်ရှိခဲ့တဲ့ “The Gangster,The cop and the devil” ဆိုတဲ့ ဇာတ်လမ်းလေးပဲဖြစ်ပါတယ်။ ဒီဇာတ်လမ်းထဲမှာတော့ The Gangster အဖြစ် Train to Busan၊ Eternals အစရှိတဲ့ဇာတ်လမ်းတွေနဲ့ အောင်မြင်မှုရရှိထားတဲ့ သရုပ်ဆောင် Ma Dong Seok၊ The cop အဖြစ် နာမည်ကြီးသရုပ်ဆောင် Kim Mu Yeol နဲ့ The devil အဖြစ် Kim Seong Gyoo တို့က ပါဝင်သရုပ်ဆောင်ထားပါတယ်။ ဇာတ်လမ်းလေးရဲ့ အကျဉ်းချုပ်က‌တော့ ၂၀၀၅ ခုနှစ်ဝန်းကျင်လောက်မှာ လူသတ်မှုတွေဟာ ခဏခဏဖြစ်နေပြီး အဲဒီဖြစ်ပေါ်နေသမျှ လူသတ်မှုတွေအတွက် ဘာဖြေရှင်းချက်မှ မပေးနိုင်ခဲ့တာကြောင့် မီဒီယာတွေဟာ ရဲတွေကို ဝေဖန်ရှုတ်ချနေခဲ့ကြပါတယ်။ အဲဒီအမှုကိစ္စတွေကို စုံထောက်ဖြစ်သူ Kim Mu Yeol က လိုက်စုံစမ်းရင်း ကွင်းဆက်လူသတ်မှု ဖြစ်နေတဲ့အကြောင်းကို သိရှိသွားတဲ့အချိန်မှာပဲ လူမိုက်ခေါင်းဆောင်ဖြစ်တဲ့ Ma Dong Seok ကို ဓားထိုးမှု ဖြစ်ပေါ်လာခဲ့ပါတယ်။ လူသတ်မှုဖြစ်စဉ်တိုင်းမှာ နစ်နာသူတွေအားလုံး သေသွားပြီး Gangster ကြီးတစ်ဦးတည်းသာ အဲဒီ စိတ္တဇလူသတ်သမားရဲ့လက်ထဲကနေ အသက်ရှင်ကျန်ရစ်သူဖြစ်နေကြောင်းကို Kim Mu Yeol သိရှိသွားတဲ့အခါမှာတော့ Gangster ကြီးကို ပူးပေါင်း‌‌ပေးဖို့ စတင်စည်းရုံးပါတော့တယ်။ Gangster နဲ့ cop တို့ပူး‌‌ပေါင်းသွားကြမလား၊ ကွင်းဆက်လူသတ်သမား devil ကို အတူတူဖမ်းဆီးနိုင်ကြမလား၊ ဘယ်လိုအခက်အခဲတွေ ကြုံတွေ့ရဦးမလဲဆိုတာကိုတော့ ဒီဇာတ်လမ်းလေးထဲမှာ စိတ်ဝင်စားဖွယ် ကြည့်ရှုနိုင်ပါတယ်။