Seoul Vibe

၂၀၂၂ ခုနှစ် သြဂုတ်လ ၂၆ ရက်နေ့မှာမှ Netflix ကနေ အသစ်စက်စက် ထုတ်လွှင့်တင်ဆက်လိုက်တဲ့ Seoul Vibe လို့အမည်ရတဲ့ တောင်ကိုရီးယားအမိုက်စားအက်ရှင် ဇာတ်ကားကောင်းတစ်ကားနဲ့ ရွှေပန်းသီးပရိသတ်ကြီးကို အခုပဲ မိတ်ဆက်ပေးပါမယ်။ ဒီဇာတ်ကား ဟာဆိုရင် ၁၉၈၈ ဆိုးလ် အိုလံပစ်ပွဲတော်ကို ဇာတ်အိမ်တည်ထားတာဖြစ်ပေမဲ့လို့ ၂၀၂၂ ရဲ့အလန်းစားရိုက်ချက်တွေနဲ့ ပုံဖော်ထားပြီး ကျရာ ဇာတ်ရုပ်ကို ပီပီပြင်ပြင် သရုပ်ဆောင်နိုင်တဲ့ နာမည်ကြီးမင်းသား၊ မင်းသမီးတွေကိုသာမက ဇာတ်ပို့ဇာတ်ရံတွေကိုလည်း ရှယ်တွေချည်းသာ သုံးထားတာဖြစ်လို့ ပရိသတ်တို့အားလုံး ကြည့်ရတန်စေမှာ အမှန်ပါပဲ။ ပြည်သူလူထုတွေရဲ့ သွေး၊ ချွေးကို နင်းခြေကာ ခေါင်းပုံဖြတ် အမြတ်ထုတ်၊ ကိုယ့် ကိုယ်ကျိုးကိုပဲ ကြည့်‌နေကြတဲ့ အတ္တကြီးအာဏာရှင်တွေကို တောင်ကိုရီးယားနိုင်ငံရဲ့ တာဝန်သိ အမှုစစ်တစ်ယောက်ဟာ အရဲစွန့်ဖော်ထုတ်ဖို့အတွက် တရားမဝင်လုပ်ကိုင်ပြီး အသက်မွေးနေတဲ့ အရည်အချင်းရှိလူငယ်ယာဉ်မောင်းသမား (ဇာတ်လိုက်)နဲ့ စက်ပြင် အဖွဲ့တို့ကို အပေးအယူကြီးကြီး ကမ်းလှမ်းကာ အတူလက်တွဲလုပ်ဆောင်ဖို့ လျှို့ဝှက်အစီအစဉ်ဆွဲပါတော့တယ်။ အဲ့ဒီနောက်မှာတော့ မလွယ်ကူလှတဲ့ မစ်ရှင်ကြီးကို လက်ခံလိုက်တဲ့ စိတ်အားထက်သန်လွန်းပြီး တဇွတ်ထိုးဆန် ခေါင်းမာတတ်ကြတဲ့ လူငယ်တစ်စုနဲ့ အရာရောက် လွန်းတဲ့ အမိုက်မှောင်ထဲက အာဏာရှင်တို့ ထိပ်တိုက်တွေ့ကြတဲ့အချိန်မှာ ဘာတွေ ဘယ်လိုဆက်ဖြစ်သွားမလဲဆိုတာ ပရိသတ်တို့တွေ ရင်တထိတ်ထိတ်နဲ့ မျက်တောင်ခတ်ဖို့ မေ့ရလောက်တဲ့အထိကို စိတ်ဝင်တစား ကြည့်ရှုခံစားကြရမှာဖြစ်ပါတယ်။