Painted Skin

ဒီဇာတ်ကားလေးကတော့ တရုတ်ပြည်မှာ နာမည်ကြားလိုက်တာနဲ့ မသိတဲ့သူ မရှိသလောက်ဖြစ်တဲ့ နာမည်ကြီးဇာတ်ကား တစ်ကားပါ။ ဒီဇာတ်ကားရဲ့ မူရင်းသရုပ်ဆောင်တွေက အားလုံးသိကြတဲ့ ကျောက်ဝေး၊ ကျိုးရွှင့်၊ ဒိုနီရန်း တို့ပဲ ဖြစ်ပါတယ်။ ဇာတ်ကားက အရမ်း နာမည်ကြီးတော့ ပြန်ရိုက်ကြတဲ့လူတွေ၊ ဇာတ်လမ်းတိုတွေ အများကြီးပဲ ရှိပါတယ်။ ဒီတစ်ခေါက် ၂၀၂၂ မှာ ပြန်ရိုက်တဲ့ ဇာတ်ကားလေး‌ကတော့ iqiyi rating 8.9/10 ရထားပါတယ်။ ဇာတ်လမ်းလေးထဲမှာ လူတွေရဲ့ မျက်နှာအရေခွံကို စုပ်ယူတတ်တဲ့ မိစ္ဆာမကြီးရဲ့ လက်အောက်က မိစ္ဆာမလေး“ရှောင်ရုံ”ဟာ “ဝမ်ဟိုင်ချင်း”ဆိုတဲ့ စာဂျပိုးလေး တစ်ယောက်ကို ချစ်မိသွားခဲ့တာပါ။ ဒါပေမဲ့“ဝမ်ဟိုင်ချင်း”မှာ နေမကောင်းဖြစ်နေတဲ့ “အားရော့”ဆိုတဲ့ ဇနီးတစ်ယောက်ရှိနေပါတယ်။ ယောက်ျားတစ်ယောက်တည်းကိုပဲ ချစ်မိနေတဲ့ မိန်းကလေး နှစ်ယောက်ရဲ့ ကြားထဲမှာ ထူးဆန်းစွာဖြစ်တည်နေတဲ့ နားလည်မှုကို တွေ့ရှိရမှာပါ။ လူပဲဖြစ်ဖြစ် မိစ္ဆာပဲဖြစ်ဖြစ် မျက်နှာအပေါ်ယံ အရေခွံက အရေးမကြီးပါဘူး၊ စိတ်ထားကောင်းဖို့ကပဲ လိုအပ်ပါတယ် ဆိုတဲ့အကြောင်းကို ဒီဇာတ်ကားလေးထဲမှာ တွေ့မြင်ရမှာပဲ ဖြစ်ပါတယ်။ အချစ်က လူတွေကို ခက်ထန်ပြီး အမုန်းတရားတွေနဲ့ ပြည့်နှက်စေနိုင်တဲ့ အချိန်လည်း ရှိပြီး၊ မိစ္ဆာလိုမျိုး နှလုံးသားကင်းမဲ့တဲ့ သူကိုတောင် နူးညံ့တဲ့ သူတစ်ယောက် ဖြစ်သွားအောင် ပြောင်းလဲ စေနိုင်တဲ့ အချိန်မျိုးလည်း ရှိတယ်ဆိုတဲ့‌ ခံစားချက်လေးကိုလည်း ရရှိမှာဖြစ်ပါတယ်။