My Left Eye Sees Ghosts

ဒီတစ်ခေါက် ဇာတ်ကားလေးကတော့ ၂၀၀၂ ခုနှစ်မှာ ဟောင်ကောင်ဘက်က ရိုက်ထားတဲ့ ဟာသ သရဲကားလေးပါ။ သရဲကား ဆိုလို့ ကြောက်ဖို့ ကောင်းတယ်တော့ မထင်နဲ့နော်။ ဟာသတွေပဲ များပြီးတော့ လန့်စရာတွေ ဘာတွေ မပါလို့ ကြည့်ပျော်ရှုပျော် ဇာတ်ကားလေးပါ။ ဒီကားက Iqiyi rating 9.6/10 တောင် ရထားတာ ဆိုတော့ တော်တော် ကြည့်ကောင်းတယ်လို့ ပြောရမယ်။ ဇာတ်လမ်းကတော့ ချမ်းသာတဲ့ သူဌေးသားလေး“ဒန်နီရယ်”နဲ့ လက်ထပ်ထားတဲ့ ကောင်မလေး “မေ”က အဲ့သူဌေးသား ဆုံးသွားတဲ့ အချိန်မှာ အမွေတွေ အများကြီးကို ရလိုက်တာပေါ့နော်။ “မေ”က ဆင်းရဲတဲ့ မိသားစုက လာတဲ့ အတွက် ပိုက်ဆံတွေ အများကြီး ရလိုက်တဲ့ အချိန်မှာ သုံးဖို့ ဖြုန်းဖို့ ထိုင်စားဖို့က လွဲရင် ဘာမှ စိတ်မဝင်စားတော့ပါဘူး။ တစ်ရက်တော့ အရက်မူးပြီး ကားမှောက်သွားပါတော့တယ်။ ဒါပေမဲ့ သေကံ မပါသေးတဲ့ “မေ”က ဆေးရုံမှာ ခွဲစိတ် ကုသပြီး ပြန်ကောင်းခဲ့ပါတယ်။ ဒါပေမဲ့ ကားမှောက်ပြီးကတည်းက “မေ”က သူ့ရဲ့ ဘယ်ဘက် မျက်လုံးနဲ့ သေပြီးသား လူတွေ၊ ပြောရရင်တော့ သရဲတွေကို တွေ့နေရတာပေါ့နော်။ အဲ့ဒီ သရဲတွေထဲမှာ “မေ”ငယ်ဘဝက ဆုံးသွားတဲ့ အတန်းဖော်“အားကိန်”လည်း ပါတယ်။ သရဲတွေ ဆိုပေမဲ့ ပေါတောတောလေးတွေ ဖြစ်ပြီး ရယ်စရာတွေ အများကြီးပါပါတယ်။ အလှည့်အပြောင်းလေးကလည်း အရမ်းလှလို့ ကြည့်သင့်တဲ့ ဇာတ်ကားလေးပါနော်။