Men in Black

ဒီတစ်ခါမှာတော့ ရွှေပန်းသီးပရိတ်သတ်ကြီးတို့ကို မင်းသားကြီး Will Smith ငယ်စဉ်အခါက ရိုက်ကူးခဲ့တဲ့ ဟောင်းပေမဲ့ကောင်းနေဆဲ Men in Black ဆိုတဲ့ စိတ်ကူးယဉ်သိပ္ပံဇာတ်မြူးလေးကို တင်ဆက်ပေးချင်ပါတယ်။ ၁၉၉၇ မှာ ရိုက်ကူးခဲ့တဲ့ဇာတ်ကားလေးဖြစ်ပြီး Will Smith နဲ့ မြန်မာပရိသတ်အများစုကိုရင်းနှီးစေခဲ့တဲ့ ဇာတ်ကားပဲဖြစ်ပါတယ်။ ဇာတ်လမ်းအကျဉ်းကတော့ ဂြိုဟ်သားတွေက အမေရိကန်အစိုးရနဲ့နားလည်မှုယူပြီး ကမ္ဘာပေါ်မှာလာရောက်နေထိုင်ကြပါတယ်။ ဂြိုဟ်သားတွေရဲ့တည်ရှိမှုကို လူသားတွေမသိအောင် ထိပ်တန်းလျှို့ဝှက်ချက်အဖြစ်ထားရှိပြီး ဂြိုဟ်သားတွေရဲ့ လုပ်ဆောင်မှုအဝဝကို Men in Black ဆိုတဲ့ လျှို့ဝှက်အဖွဲ့အစည်းက စောင့်ကြည့်ထိန်းသိမ်းပါတယ်။ ထိုအချိန်မှာပဲ NYPD မှာတာဝန်ထမ်းဆောင်နေတဲ့ James အဖြစ်သရုပ်ဆောင်ထားတဲ့ Will Smith က တရားခံလိုက်ဖမ်းရင်း တရားခံရဲ့လျှို့ဝှက်ဆန်းပြားမှုကို တွေ့ရှိသွားပြီး တွေ့ရှိချက်ကိုပြန်ပြောတဲ့အခါ ဘယ်သူမှမယုံကြပါဘူး။ ထိုအခိုက် MIB ရဲ့ လျှို့ဝှက်အေးဂျင့် အေးဂျင့် K ရောက်ရှိလာပြီး James ကို MIB မှာ လူရွေးလာဖြေဖို့ လိပ်စာပေးသွားပါတယ်။ ဒီနောက်မှာတော့ စမ်းသပ်မှုတွေကိုဖြတ်ကျော်ရင်း MIB မှာ အေးဂျင့် K နဲ့အတူ တာဝန်ထမ်းဆောင်ရင်း ကမ္ဘာကိုဖျက်ဆီးမဲ့ ဂြိုဟ်သားရောက်ရှိလာတဲ့အခါမှာ အေးဂျင့် K နဲ့ James တို့ အတူလက်တွဲရင်း ဂြိုဟ်သားကို ဘယ်လိုရင်ဆိုင်တိုက်ခိုက်ကြမလဲ၊ ဘယ်လိုအလွဲတွေနဲ့ ပရိသတ်ကြီးကို ရယ်မောစေနိုင်မလဲဆိုတာကို စောင့်ကြည့်ရမှာပါ။ ရယ်ရယ်မောမောကြည့်ရှုရမဲ့ ကားကောင်းလေးတစ်ကား ဖြစ်တာကြောင့် ဇာတ်ကားလေးကိုကြည့်ရင်းနဲ့ ခဏတာပဲဖြစ်ဖြစ် ဘဝအမောတွေကနေ လွတ်မြောက်နိုင်ကြပါစေ ရွှေပန်းသီးပရိသတ်ကြီးတို့ရေ။