
ဒီတစ်ခေါက်မိတ်ဆက်ပေးမယ့် ဇာတ်ကားကတော့ Thriller/Horror အမျိုးအစားဖြစ်ပြီး IMDb 6.9 ရရှိထားတဲ့ 2019ထွက် Indonesia ကားဖြစ်ပါတယ် ဒီဇာတ်လမ်းကတော့ အလှူရှင်နည်းပြီး ဆင်းရဲတဲ့မိဘမဲ့ဂေဟာတစ်ခုမှာ ရိုးသားပြီး အရာရာတိုင်းကို ကြင်နာတတ်တဲ့စိတ်ထားရှိတဲ့ အီနာဆိုတဲ့ မိဘမဲ့ကလေးတွေ အရမ်းချစ်ကြတဲ့ ကောင်မလေးတစ်ယောက်ရှိပါတယ်။ ငွေကြေးမဖူလုံပေမယ့် မိဘမဲ့ကလေးတွေရော ထိန်းပေးတဲ့သူတွေကပါ တစ်ယောက်နဲ့တစ်ယောက် မေတ္တာထားကြတော့ သိပ်ကိုပျော်ရွှင်စရာကောင်းတဲ့ ဂေဟာတစ်ခုဖြစ်တာပေါ့။ တစ်နေ့ အီနာတို့ရဲ့မြို့မှာ မိသားစုတစ်စုလုံးအသတ်ခံရပေမယ့် ထူးဆန်းစွာနဲ့ အန်ဒီဆိုတဲ့ကောင်လေးတစ်ယောက်ပဲ အသက်ရှင်ခဲ့ပါတယ်။ အန်ဒီရဲ့မိဘတွေ သေဆုံးခဲ့တာကြောင့် သူဟာအီနာတို့ရဲ့ဂေဟာကို ရောက်လာခဲ့တာပေါ့။ ဂေဟာရဲ့ကျောင်းအုပ်ဆရာကြီးက ဘဏ္ဍာရေးအဆင်မပြေတာကြောင့် လက်မခံခဲ့ပေမယ့် စိတ်ထားကောင်းတဲ့အီနာကတော့ သူကိုယ်တိုင်တာဝန်ယူပြီး အန်ဒီကိုလက်ခံခဲ့ပါတယ်။ အဲဒီလိုနဲ့ အန်ဒီကိုလက်ခံပြီးတဲ့နောက် မိဘမဲ့ဂေဟာမှာရှိနေတဲ့ ကလေးတွေကရော အန်ဒီကို သူငယ်ချင်းအဖြစ်လက်ခံနိုင်ပါ့မလား၊ ဂေဟာမှာရော ဘယ်လိုထူးဆန်းတာမျိုးတွေကြုံရမလဲ၊ အန်ဒီရဲ့နောက်ကြောင်းကရော ဘယ်လိုမျိုးလဲဆိုတာကိုတော့ ဒီဇာတ်ကားထဲမှာ ကြည့်ရှုလိုက်ပါ။