Mad Money

အကယ်လို့များ သင်သာ ဘဝမှာတစ်ခါမှစိတ်မကူးဖူးတဲ့ ငွေပမာဏအများကြီးကို လက်တွေ့မြင်ရ ထိတွေ့ခွင့်ရမယ်ဆိုရင် ဘာလုပ်မလဲ။ ဒီတစ်ခါမှာတော့ 2008 ကထွက်ခဲ့တဲ့ Mad Money ဆိုတဲ့ အင်္ဂလိပ်ကားကောင်းလေးတစ်ကားနဲ့ မိတ်ဆက်ပေးပါရစေ။ ကိစ္စကြီးတစ်ခုလုံးကတော့ ဘရစ်ဂျက်ဆိုတဲ့အဘွားကြီးဟာ တစ်သက်လုံးချမ်းချမ်းသာသာနေလာခဲ့ရာက ရုတ်တရက်အကြွေးတင်ပြီး အိမ်ရောင်းရဖို့ဖြစ်လာတာနဲ့စပါတယ်။ ဆင်းဆင်းရဲရဲမနေနိုင်တဲ့ဘရစ်ဂျက်ဟာ မြိုးမြိုးမြက်မြက်ငွေရတဲ့အလုပ်ရှာရင်း ဖက်ဒရယ်ဘဏ်တစ်ခုမှာ သန့်ရှင်းရေးဝန်ထမ်းလုပ်ဖို့ အကြောင်းဖန်လာခဲ့ပါတယ်။ ငွေမြင်ရင်လိုချင်တဲ့ လူ့လောဘအပြင် အကြွေးပါတင်နေတဲ့ဘရစ်ဂျက်ဟာ ဘဏ်ကငွေတွေကိုလောဘတက်ပြီး ခိုးဖို့ကြံပါတော့တယ်။ ဒီလိုနဲ့သူသိမ်းသွင်းလိုက်တဲ့ သက်လတ်ပိုင်းဆင်ဂယ်မားသားတစ်ယောက်ရယ် ဆေးစွဲနေတဲ့လူငယ်မလေးရယ် သုံးယောက်ပေါင်းပြီး ဘဏ်ကငွေတွေကို ပိပိရိရိနဲ့ လိမ်လည်ခိုးယူပြီး သုံးယောက်သား အောက်ခြေလူတန်းစားအနေနဲ့ မတတ်နိုင်တဲ့အရာတွေကို အေးဆေးတတ်နိုင်လာကြပြီး ငွေရေးကြေးရေးခြေသလုံးမွှေးဖြစ်ကာ ဟန်ကျနေကြပါတယ်။ ဒါကို ဘဏ်အနေနဲ့ ဘယ်လိုစုံစမ်းဖော်ထုတ်မလဲ ဘရစ်ဂျက်တို့ကရော လွတ်အောင်ပြေးနိုင်မလားဆိုတာကို သည်းထိတ်ရင်ဖိုကြည့်ရှုရမဲ့အပြင် သူတို့တစ်ယောက်အပေါ်တစ်ယောက်ထားတဲ့ စေတနာတွေ အနစ်နာခံမှုတွေကိုပါမြင်ရမှာမို့ လက်မလွတ်သင့်တဲ့ ကားကောင်းလေးတစ်ကားပါပဲ။ Bank robbery ပုံစံမျိုးဆိုပေမဲ့ ဇာတ်ကားကအလေးကြီးမဟုတ်ဘဲ ဘရစ်ဂျက်တို့အကွက်ရွှေ့တာတွေကို ပေါ့ပေါ့ပါးပါးနဲ့ comedy ဆန်ဆန်ရိုက်ပြထားတာမို့ နေ့စဉ်ဘဝက ဘဝအမောတွေပြေပျောက်ဖို့ဆို ကြည့်ကိုကြည့်သင့်တဲ့ကားလေးပါနော်။