Luca

ဒီဇာတ်ကားလေးကတော့ 2021 ခုနှစ်ကထွက်ရှိထားပြီး IMDB 7.4 အထိတောင်ရရှိထားတဲ့ Disneyနဲ့ Pixar တို့ပူးပေါင်းတင်ဆက်ထားတဲ့ ဇာတ်ကားကောင်းလေးတစ်ကားဖြစ်ပါတယ်။ လူကာဆိုတဲ့ ကောင်လေးတစ်ယောက်ဟာ လူတွေပင်လယ်မိစ္ဆာလို့သတ်မှတ်ထားကြတဲ့ မျိုးနွယ်စုတစ်စုထဲက ကောင်လေးတစ်ယောက်ပေါ့။ အပြန်အလှန်အနေနဲ့ အဲ့ဒီမျိုးနွယ်စုဟာလည်း လူတွေကို ကုန်းမိစ္ဆာဆိုပြီး ကြောက်ကြတာပါပဲ။ ဒါကြောင့် လူကာရဲ့မိဘတွေကလည်း လူကာကို ကုန်းပေါ်ကိုမတက်ဖို့မှာထားတာပေါ့။ တစ်နေ့မှာတော့ လူကာဟာ အယ်လ်ဘက်တိုဆိုတဲ့ သူတို့မျိုးနွယ်စုထဲက ကောင်လေးတစ်ယောက်နဲ့တွေ့ပြီး မတော်တဆ ကုန်းပေါ်ကိုတက်မိသွားပါတယ်။ အယ်လ်ဘက်တိုဟာဆိုရင် သူကိုယ်တိုင်က ပင်လယ်မိစ္ဆာဆိုပေမယ့်လည်း ကုန်းပေါ်မှာ ကျင်လည်ကျက်စားနေတဲ့ကောင်လေးပါ။ ဒီလိုနဲ့ လူကာဟာ ကုန်းပေါ်ကိုခိုးထွက်ရင်း ဗက်စ်ပါဆိုတဲ့ ဆိုင်ကယ်အကြောင်းနဲ့ဆက်စပ်ပြီး ကမ္ဘာအနှံ့ကို အယ်လ်ဘက်နဲ့အတူ လျှောက်သွားချင်စိတ်တွေဖြစ်လာပါတော့တယ်။ လူကာ ကုန်းပေါ်ခိုးတက်နေတဲ့အကြောင်းကို သူ့ရဲ့မိဘတွေသိတဲ့အခါမှာတော့ လူကာကိုရေနက်ပိုင်းကြီးထဲကိုပို့ဖို့ စီစဥ်ကြတဲ့အတွက် လူကာဟာ အိမ်ကနေခိုးထွက်လာပြီး အယ်လ်ဘက်တိုနဲ့အတူ ဗက်စ်ပါကိုရဖို့ လူတွေနေတဲ့ ပေါ်တိုရိုဆိုမြို့ကိုသွားကြပါတော့တယ်။ ဒီလိုနဲ့ အီတလီရိုးရာပြိုင်ပွဲတစ်ခုမှာ ဗက်စ်ပါကိုရဖို့ ဂျူလီယာဆိုတဲ့ တံငါသည်ကြီးရဲ့သမီးလေးနဲ့ ပူးပေါင်းပြီး ပြိုင်ပွဲဝင်ကြဖို့ အကြောင်းဖန်လာတဲ့အခါမှာတော့ ပြိုင်ပွဲမှာဘာတွေဆက်ဖြစ်ကြမလဲ? ပင်လယ်မိစ္ဆာတွေကိုကြောက်ကြတဲ့ လူတွေနေတဲ့မြို့တစ်ခုမှာ လူကာနဲ့ အယ်လ်ဘက်တိုတို့ ဘယ်လိုတွေရှင်သန်သွားကြမလဲ? ပြိုင်ပွဲကိုဘယ်လိုအနိုင်ယူသွားကြမလဲ? ဆိုတာတွေကို သူငယ်ချင်းသံယောဇဥ်တွေ၊ တစ်ယောက်နဲ့တစ်ယောက် ရိုင်းပင်းကူညီမှုလေးတွေ၊ အီတလီရိုးရာအစားအစာတွေ၊ စကားပြောပုံလေးတွေကို ဒီဇာတ်ကားလေးမှာ ချစ်စဖွယ်မြင်တွေ့ရမှာဖြစ်တဲ့အတွက် အားလုံးပဲရှုစားအားပေးကြပါဦးနော်။