Jurassic Park

အားလုံးပဲ Jurassic Park Dominion ကလည်း ထွက်ထားတာမကြာသေးတော့ ဒိုင်နိုဆောကားတွေ လွမ်းနေကြမယ်ထင်လို့ Jurassic Park (1993) ဇာတ်ကားလေးနဲ့အတူ ပြန်လာပါပြီနော်။ ဒီဇာတ်ကားကတော့ Jurassic World Franchise ကြီးရဲ့ ပထမဆုံးဇာတ်ကားဖြစ်ပြီး မျိုးသုဉ်းသွားတဲ့ဒိုင်နိုဆောတွေကို ကမ္ဘာမြေပေါ် ပြန်လည်ခေါ်ယူနိုင်ခဲ့ပုံအကြောင်းလို့ ပြောလို့ရပါတယ်။ ကံမကောင်းအကြောင်းမလှစွာနဲ့ဘဲ ဒိုင်နိုဆောဥယျာဉ်ကြီးဟာ မဖွင့်ရသေးခင်မှာ မတော်ဆတဆမှုတစ်ခုကြောင့် အလုပ်သမားတစ်ယောက်သေဆုံးသွားတဲ့အတွက် ရှယ်ယာရှင်တွေဆူပူလာကြပါတယ်။ အဲဒါကိုဖြေရှင်းဖို့ ပိုင်ရှင်ဖြစ်သူ ဂျွန်ဟမ်မွန်ဟာ ဒီလောကရဲ့နာမည်ကျော်တွေဖြစ်တဲ့ ဒေါက်တာဂရန့်၊ ဒေါက်တာဆက်တလာနဲ့ ဒေါက်တာမဲလ်ကွန်းတို့ကို Jurassic Park အတွက် ထောက်ခံချက်ရေးပေးဖို့သိမ်းသွင်းရင်း ဥယျာဉ်ဆီကို အားလပ်ရက်အလည်အပတ်ခရီး ခေါ်ဆောင်လာပါတော့တယ်။ ဒါပေမဲ့လည်း ကံဆိုးချင်တော့ အခြေအနေအကြောင်းကြောင်းကြောင့် ဥယျာဉ်ရဲ့လုံခြုံရေးစနစ်တွေ ယိုယွင်းသွားခဲ့ပြီး ရက်စက်ကြမ်းကြုတ်တဲ့ အသားစားဒိုင်နိုဆောကြီးတွေ လွတ်ထွက်လာခဲ့ပါတယ်။ ဒီလိုနဲ့ပဲ အလည်အပတ်ခရီးရောက်ရှိလာတဲ့ ဒေါက်တာဂရန့်တို့ဇာတ်လိုက်ကျော်တစ်စု စွန့်စားခန်းဖွင့်ဖို့ဖန်လာရတဲ့အပြင် ကလေးမချစ်တဲ့ဒေါက်တာဂရန့်မှာလည်း ပိုင်ရှင်ရဲ့မြေးလေးတွေကို ကာကွယ်ဖို့ကြိုးစားရပါတော့တယ်။ ရင်ခုန်စရာတွေနဲ့ ပြည့်နှက်နေတဲ့ ဒီဥယျာဉ်ကြီးရဲ့အဆုံးသတ်က ဘယ်လိုဖြစ်သွားမလဲ.. ဥယျာဉ်ဖွင့်ခွင့်ရသွားမလား.. ကလေးတွေကိုရော ဒိုင်နိုဆောကြီးတွေလက်ထဲက ကာကွယ်နိုင်မလားဆိုတာကို ဇာတ်ကားလေးကြည့်ရင်း ပြန်လည်ခံစားကြည့်ကြပါဦးနော်။ ကြည့်ပြီးသားသူတွေအနေနဲ့လည်း အခုချိန်ဆိုမေ့လောက်ပြီဖြစ်တဲ့အပြင် IMDB rating အနေနဲ့လည်း တော်တော်ကိုမြင့်တယ်ပြောရမဲ့ 8.2 အထိရထားတာမို့ နောက်တစ်ခေါက်လောက် ပြန်လည်ခံစားရင်း ဒိုင်နိုဆောကမ္ဘာထဲ အလည်သွားလိုက်ကြပါဦးနော်…