Howl’s Moving Castle

IMDb Rating 8.2 အထိရရှိထားတဲ့ ၂၀၀၄ ခုနှစ်ရဲ့ မရိုးအီသွားစေတဲ့ဆွဲဆောင်မှုအပြည့်နဲ့ Japan animation ကားကောင်းလေးကို အခုပဲ မိတ်ဆက်ပေးပါ့မယ်နော်။ ဇာတ်အိမ်လေးရော၊ ဇာတ်လမ်းအသွားအလာတွေရော အထူးပြောစရာမလိုအောင် ကောင်းလွန်းလို့ အဆုံးသတ်ထိ ကြည့်ရှူသူတွေကို လွမ်းဆွတ်ခြင်းတွေနဲ့ ကျန်ရစ်အောင်ထားခဲ့နိုင်တဲ့ဇာတ်လမ်းကောင်းလေးလို့ ပြောရင်မမှားပါဘူး။ ဆိုးဖီလို့အမည်ရတဲ့ မိန်းကလေးဟာဆိုရင် သိမ်သိမ်မွေ့မွေ့ရှိလှပြီး ဦးထုပ်ချုပ်လုပ်တဲ့သာမန်မိန်းမပျိုလေးပါ။ တစ်နေ့မှာတော့ ဆိုးဖီလေးက မထင်မှတ်ဘဲ မှော်ပညာတတ်တဲ့ ဟားအုရုလို့ခေါ်တဲ့မှော်ဆရာလေးနဲ့တွေ့ဆုံမိသွားပါတယ်။ တွေ့တွေ့ချင်းကတည်းက မှော်ဆရာလေး ဟားအုရုက ဆိုးဖီ့ကို မထိတရိလုပ်နေတဲ့အမှုထမ်းတွေလက်ကနေ ကူညီကယ်တင်ပေးခဲ့လို့ မိန်းမပျိုလေးဆိုးဖီဟာဆိုရင် သူမနှလုံးသားလေးသိမ်းသွင်းခံလိုက်ရ သလိုကို ဟားအုရုအပေါ် မေတ္တာသက်ဝင်သွားခဲ့ပါတယ်။ ဒါပေမဲ့ သာမန်မိန်းမပျိုလေးတစ်ယောက်က မှော်ဆရာကိုမှသွားပြီး ပတ်သက်မိ သွားတော့ နောက်ဆက်တွဲအကျိုးဆက်အနေနဲ့ မှော်ဆရာဟားအုရုရဲ့နှလုံးသားကို လိုချင်တပ်မက်နေတဲ့စုန်းမကြီးလက်ချက်နဲ့ ဆိုးဖီလေးက အသက် ၉၀ အရွယ်အဘွားကြီး ဖြစ်သွားပါတော့တယ်။ အဲဒီနောက်မှာတော့ ဆိုးဖီလေးရဲ့ဘဝက ခက်ခဲကြမ်းတမ်းမှုတွေနဲ့ကြုံတွေ့ရပြီး ကံကြမ္မာရဲ့မျက်နှာသာပေးခြင်းကို ခံရပါ့မလား၊ မှော်ဆရာ‌လေးဟားအုရုနဲ့ ဘယ်လိုပြန်ပြီးတွေ့ဆုံနိုင်ဦးမလဲ၊ အသက်ကြီးသွားတဲ့ဆိုးဖီလေးကို ဟားအုရုကရော မှတ်မိနိုင်ပါ့မလားဆိုတာတွေကို စိတ်ဝင်စားစရာကောင်းစွာနဲ့ သုတရသစုံလင်စွာကြည့်ရှူခံစားရမယ့်အပြင် သွေးသား မတော်စပ်တဲ့သူစိမ်းတွေဆီကလည်း မိသားစုလိုမျိုး ချစ်ခြင်းမေတ္တာတွေရရှိစေနိုင်ကြောင်း ချစ်စရာကောင်းတဲ့သရုပ်ဖော်ပုံလေးတွေနဲ့ ကြည့်ရှူ ခံစားရဦးမှာပါ။