Hey! Sinamika

အခုတစ်ခေါက် တင်ဆက်ပေးမှာကတော့ 2022 March လပိုင်းမှာ ထွက်ရှိခဲ့တဲ့ “Hey Sinamika” လို့အမည်ရတဲ့ Romance/Comedy ဇာတ်လမ်းလေးပဲ ဖြစ်ပါတယ်။ ဒီဇာတ်ကားလေးကိုတော့ အထူးသဖြင့် အရမ်းချစ်တတ်ပြီး ဂရုစိုက်တတ်တဲ့ ချစ်သူတွေကို ပိုင်ဆိုင်ထားတဲ့ မိန်းကလေးတွေကြည့်ဖို့အတွက် တိုက်တွန်းလိုက်ပါတယ်။ ဒီဇာတ်လမ်းကို ဒါရိုက်တာ Brinda မှ ရိုက်ကူးတင်ဆက်ထားပြီး နာမည်ကြီး သရုပ်ဆောင်တွေဖြစ်တဲ့ Dulquer Salmaan, Aditi Rao Hydari နဲ့ Kajal Aggarwal တို့က အဓိက ပါဝင်သရုပ်ဆောင်ထားပါတယ်။ အညွှန်းကတော့ ရာလန် (Dulquer Salmaan) ဟာ အရာရာတိုင်းကို မေးခွန်းထုတ်နေတတ်ပြီး စူးစမ်းလေ့လာမှုတွေ အမြဲလုပ်နေတဲ့သူ တစ်ယောက်ပါ။ အဲဒီအချက်ကပဲ သူ့ကို စကားအရမ်းများတဲ့သူတစ်ယောက်ဖြစ်အောင် ဖန်တီးခဲ့ပါတော့တယ်။ သူ့ဇနီးနဲ့ တွေ့ပြီးနောက်ပိုင်းမှာတော့ ဟင်းချက်တာကို အရမ်းဝါသနာပါပြီး ဉယျာဉ်စိုက်တာတွေကိုလည်း စိတ်ဝင်စားတဲ့ ရာလန်ဟာ အလုပ်ကထွက်လိုက်ပြီး အိမ်မှာပဲ သူ့ရဲ့ချစ်ဇနီးလေးကိုပဲ အမြဲတမ်း အရိပ်တကြည့်ကြည့်နဲ့ ဂရုစိုက်ပေးနေပါတော့တယ်။ တစ်ဖက်မှာတော့ သူ့ရဲ့ဇနီးဖြစ်သူ မိုနာ (Aditi Rao Hydari) ကတော့ သူ့ယောက်ျားရဲ့ ဂရုစိုက်မှုတွေကြားမှာ ပိတ်မိနေပါတော့တယ်။ သူ စားချင်တဲ့အစားအသောက်တွေကို မစားရ၊ သူအတွက် ကိုယ်ပိုင်အချိန်လည်း မရ၊ အထူးသဖြင့် သူ့ယောက်ျားရဲ့ စကားများတဲ့ဒဏ်တွေကို မခံနိုင်တော့တာကြောင့် သူ့ယောက်ျားကို ကွာရှင်းဖို့အထိ ဆုံးဖြတ်လိုက်ပါတော့တယ်။ ဒါပေမဲ့ သူ့ယောက်ျားက သူတစ်ယောက်တည်းအပေါ် လုံးဝသစ္စာရှိပြီး ဖောက်လည်း မဖောက်ပြန် အမှားလုပ်ထားတာလည်း မရှိတာကြောင့် သူ့ခမျာ ကွာရှင်းလို့ မရနိုင် ဖြစ်နေပါတယ်။ တစ်နေ့မှာတော့ မိုနာတစ်ယောက် အရမ်းလည်းလှပြီး အိမ်ထောင်ရေးပြဿနာတွေ ဖြေရှင်းပေးရာမှာလည်း ကျွမ်းကျင်တဲ့ စိတ်ပညာအထူးကု ကာဂျယ် (Kajal Aggarwal)နဲ့ တွေ့ဆုံမိတဲ့ အခါမှာတော့ သူ့ယောက်ျားနဲ့ ကွာရှင်းလို့ရအောင် လုပ်ပေးဖို့ ကာဂျယ်ကို အတင်းအကျပ် တောင်းဆိုပါတော့တယ်။ မိုနာ သူ့ယောက်ျားနဲ့ ကွာရှင်းခွင့်ရသွားမလား၊ ချစ်တတ်လွန်းတဲ့ သူ့ယောက်ျားကပဲ အနိုင်ရသွားမလားဆိုတာကိုတော့ ဒီဇာတ်လမ်းလေးမှာ စိတ်ဝင်စားဖွယ် ကြည့်ရှူခံစားလို့ရမှာပါ။