Happy Ghost V

ဒီဇာတ်ကားကတော့ ကြိုးသရဲရဲ့ ငါးကားမြောက် နောက်ဆုံးဇာတ်ကားပဲ ဖြစ်ပါတယ်။ ပြောရရင် ဒီဇာတ်ကားမှာ ကြိုးသရဲဟာ နတ်ဖြစ် သွားပါပြီ။ ဒီဇာတ်ကားရဲ့ အဓိကဇာတ်ကောင်ကတော့ မက်ဂျစ်လို့ ခေါ်တဲ့ ဖြူဖြူဖွေးဖွေး အမွေးပွခွေးကြီးပဲ ဖြစ်ပါတယ်။ ဇာတ်လမ်းကတော့ ရှေ့က ကြိုးသရဲဇာတ်ကားများလိုပဲ ပေါ့ပေါ့ပါးပါးနဲ့ ရယ်ရယ်မောမောကြည့်ရမှာပါ။ ဇာတ်လမ်းအကျဉ်းအနေနဲ့ကတော့ မက်ဂျစ်ဆိုတဲ့ ခွေးလေး ဟာ သူ့သခင်မ ကေသီ ခရီးထွက်သွားတာကြောင့် သူ့သခင်မရဲ့ ရည်းစားအားဂျက်နဲ့ အတူတူနေခဲ့ရပါတယ်။ ဒါပေမယ့် ဆိုးတာက အားဂျက်က သူ့ဘော်ဒါတွေနဲ့ ပျော်ပါးမူးရူးနေပြီး သူ့ကိုဂရုမစိုက်တာကြောင့် သူ့အိမ်က ထွက်သွားခဲ့ပါတယ်။ အဲ့မှာ ကြိုးသရဲခေါ်ပျော်တတ်တဲ့ နတ်ရဲ့ ကျောင်းဆောင်ထဲ ရောက်သွားပါတယ်။ အဲ့မှာ ကြိုးသရဲရဲ့ ကျောင်းဆောင် မီးမလောင်အောင် သူ ကယ်ပေးလိုက်တဲ့ အတွက် ကြိုးသရဲက သူ့ကို လိုရာဆု တောင်းစေပါတယ်။ ဒါနဲ့သူက လူဖြစ်ခွင့်တောင်းလိုက်ပါတယ်။ ဒီလိုနဲ့ခွေးလေး မက်ဂျစ် လူဖြစ်လာပြီး ဘယ်လိုတွေတလွဲတွေလုပ်ပြီး သူ့သခင်မနဲ့ ဘယ်လိုပြန်ဆုံဖြစ်မလဲဆိုတာတော့ ပရိသတ်ကြီး ကိုယ်တိုင်ပဲ ကြည့်ရှုခံစားလိုက်ပါ။