Gerald’s Game

ဒီဇာတ်ကားလေးကတော့ ဆိုက်ကိုကား တစ်ကားပဲ ဖြစ်ပါတယ်။ ဂျက်စီနဲ့ သူမယောက်ျား ဂျဲရတ်ဟာ အပန်းဖြေဖို့အတွက် ကန်ဘေးနားက သီးသန့်အိမ်လေးကို အလည်လာကြပါတယ်။ သူတို့ဟာ အဲဒီအိမ်မှာ တစ်ပတ်လောက်နေမယ်ဆိုပြီး တစ်ပတ်စာ အစားအသောက်တွေလည်း ယူလာကြပါတယ်။ ဂျက်စီက ညဝတ်အင်္ကျီအသစ်နဲ့ ကုတင်ပေါ်ကနေ ဆွဲဆောင်မှုရှိတဲ့ ပုံစံတွေကို လုပ်ကြည့်နေပါတယ်။ အဲဒီအချိန် ဂျဲရတ် ရောက်လာပြီး ဂျက်စီရဲ့လက်ကောက်ဝတ်တစ်ဖက်စီကို လက်ထိပ်နဲ့ကုတင်တိုင်မှာ ခတ်ထားလိုက်ပါတော့။ ဂျက်စီက ဒါကို မမျှော်လင့်ထားတဲ့ အတွက် နည်းနည်းလန့်သွားပြီး သူတို့နှစ်ယောက် ရန်ဖြစ်ကြပါတယ်။ အဲဒီအချိန် ဂျဲရတ်က ရုတ်တရက် နှလုံးဖောက်ပြီး သေဆုံးသွားပါတယ်။ ဂျက်စီကတော့ ကုတင်တိုင်မှာ လက်ထိပ်နဲ့တွဲချည်ခံရပြီး ကျန်နေခဲ့ပါတယ်။ အဲဒီအချိန်မှာ သူမက အရမ်းထိတ်လန့်လာပြီး အော်ဟစ် အကူအညီတောင်းပေမယ့် သူတို့အိမ်က သီးသန့်အိမ်ဖြစ်နေတဲ့အတွက် တစ်မိုင်ပတ်လည်မှာ ဘာအိမ်မှမရှိပါဘူး။ အဲဒီအချိန်မှာ သူမစိတ်ထဲမှာ ပုန်းအောင်းနေတဲ့ အကြောက်တရားက ပေါ်ထွက်လာခဲ့တယ်။ သူမ အဲဒီအကြောက်တရားတွေကို ဘယ်လိုတိုက်ခိုက်မလဲ။ သူမအဲဒီအိမ်ထဲမှာ ဘယ်လိုမထင်မှတ်ထားတာတွေကို ကြုံရဦးမလဲ။ သူမ အဲဒီအိမ်ကနေရော လွတ်မြောက်နိုင်ပါ့မလားဆိုတာကိုသိရအောင် ဇာတ်လမ်းလေးကို ကြည့်ကြည့်ဖို့ အကြံပေးချင်ပါတယ်။