Gehraiyaan

ဒီတစ်ခေါက် တင်ဆက်ပေးချင်တဲ့ ဇာတ်ကားလေးကတော့ ဒါရိုက်တာ Shakun Batra ရိုက်ကူးထားတဲ့ “Gehraiyaan” ဆိုတဲ့ ဇာတ်ကားပဲဖြစ်ပါတယ်။ ဒီဇာတ်ကားမှာတော့ Deepika Padukone, Siddhant Chaturvedi, Ananya Panday နဲ့ Dhairya Karwa တို့က အဓိက ပါဝင်သရုပ်ဆောင်ထားပါတယ်။ ဒီဇာတ်လမ်းလေးက နှစ်ဦးနှစ်ဖက် ဆက်ဆံရေးတစ်ခု တည်ဆောက်ပြီဆိုရင် ဖြစ်ပေါ်လာတတ်တဲ့ ချစ်ရေးချစ်ရာ အရှုပ်အထွေးတွေ၊ ဖောက်ပြန်တတ်မှုတွေကို တစ်ယောက်အပေါ် တစ်ယောက်ထားရှိတဲ့ ယုံကြည်မှုတွေက အနိုင်ယူသွားမလား၊ လောကဓံဟာ လူတွေရဲ့ဘဝအပေါ် ဘယ်လောက်အထိ သက်ရောက်မှုရှိလဲဆိုတာတွေကို ရိုက်ကူးတင်ဆက်ထားတဲ့ ဇာတ်လမ်းကောင်းလေး ဖြစ်ပါတယ်။ အညွှန်းလေးကတော့ အဲလ်လီရှာ(Deepika Padukone) က ယောဂစတူဒီယိုတစ်ခုကို ဖွင့်ထားပြီး သူ့ရဲ့ ယောဂ app အတွက် ရင်းနှီးမြှုပ်နှံမဲ့သူတွေကို ရှာနေတဲ့သူပါ။ အဲလ်လီရှာရဲ့ ငယ်ဘဝကတော့ လက်ရှိ သူရဲ့ဘဝနဲ့ မတူဘဲ သူ့ရဲ့သူငယ်ချင်း (Dhairya Karwa) နဲ့ သူ့ရဲ့ ဝမ်းကွဲညီအစ်မ(Ananya Panday) တို့နဲ့အတူတူ ချမ်းချမ်းသာသာ ပျော်ပျော်ရွှင်ရွှင်နေခဲ့ရတာပါ။ တစ်နေ့မှာတော့ အဲလ်လီရှာရဲ့အဖေက ရုတ်တရက် အဲဒီချမ်းသာပျော်ရွှင်မှုတွေ ပြည့်နှက်နေတဲ့ ဘဝကလေးကနေ သူနဲ့ သူ့အမေကို ရုတ်တရက် ခေါ်ထုတ်လာပြီး သာမန်မြို့လေးတစ်မြို့မှာပဲ အခြေချနေထိုင်ခိုင်းခဲ့ပါတယ်။ အဲဒါကြောင့်ပဲ သူ့အမေက ကိုယ့်ကိုယ်ကိုယ် အဆုံးစီရင်တဲ့အထိ ဖြစ်သွားပြီး အဲဒီအကြောင်းအရာက သူ့အတွက်တော့ အမြဲတမ်း နားမလည်နိုင်တဲ့ မေးခွန်းတစ်ခုလို ဖြစ်နေခဲ့ပါတယ်။ တစ်နေ့မှာတော့ အဲလ်လီရှာဟာ သူနဲ့ ငယ်ငယ်ကလေးကတည်းက ကွဲကွာနေခဲ့တဲ့ သူ့ရဲ့ ဝမ်းကွဲညီအစ်မ တီအာတို့ ပြန်ဆုံကြတဲ့အချိန်မှာတော့ ဘယ်လို စိတ်ဝင်စားစရာအဖြစ်အပျက်တွေ ဖြစ်သွားမလဲဆိုတာ ကြည့်ရှုခံစားလို့ရမဲ့ ဇာတ်လမ်းကောင်းလေးတစ်ကားပဲ ဖြစ်ပါတယ်။