Gangubai Kathiawadi

၁၉၆၀ ခုနှစ် ဝန်းကျင်လောက်တုန်းက အိန္ဒိယရဲ့ရွာလေးတစ်ရွာမှာ သရုပ်ဆောင် ဝါသနာပါတဲ့ ဂန်ဂါဆိုတဲ့ကောင်မလေးတစ်ယောက်ရှိခဲ့ဖူးတယ်။ တစ်နေ့မှာတော့ သူ့ရဲ့ချစ်သူက သူ့ကို မွန်ဘိုင်းမြို့ကြီးမှာ မင်းသမီးဖြစ်အောင် ကူညီပေးမယ်ဆိုပြီး မွန်ဘိုင်းမြို့ကြီးရှိရာကို ခေါ်သွားခဲ့ပါတယ်ဗျ။ ချစ်သူမျက်နှာ တစ်ရွာထင်ပြီး အိမ်ကနေခိုးထွက်လာခဲ့တဲ့ ဂန်ဂါဟာ ဉာဏ်ကောင်းပေမယ့် အချစ်ကြောင့် ရှေ့ကိုမမြင်နိုင်ဖြစ်ပြီး ဂန်ဂါတစ်ယောက် ယုတ်မာတဲ့ချစ်သူရဲ့ ဆောင်ကြာမြိုင်တစ်ခုမှာ ရောင်းစားတာကို ခံလိုက်ရပါတယ်။ နောက်ပြန်လှည့်လို့မရတော့တဲ့ ဂန်ဂါဟာ ဂန်ဂူးလို့ နာမည်ပြောင်းပြီး ပြည့်တန်ဆာတစ်ယောက်အဖြစ်နဲ့ ဘဝကို ဆက်ရင်ဆိုင်ခဲ့ပါတယ်ဗျ။ ထက်မြက်ပြီး၊ ကိုယ်ချင်းစာတရား ကြီးမားတဲ့ ပင်ကိုယ်စရိုက်ကြောင့် ဂန်ဂူးဟာ မွန်ဘိုင်းရဲ့ မြေအောက်လောကထဲမှာ ရှင်သန်ရင်း တဖြည်းဖြည်းနဲ့ ပြည့်တန်ဆာတွေရဲ့ဘဝကို ပိုပြီး ကောင်းမွန်လာအောင် မြှင့်တင်ပေးခဲ့တဲ့ ဂန်ဂူးဘိုင်ဆိုတဲ့ အာဂအမျိုးသမီးကြီးတစ်ဦး ဖြစ်လာခဲ့ပါတယ်ဗျ။ ဒီ Gangubai Kathiawadi ဆိုတဲ့ရုပ်ရှင်ကို စာရေးဆရာ Hussain Zaidi ရဲ့ Mafia Queens of mumbai ဆိုတဲ့ စာအုပ်ထဲက မှတ်တမ်းခေါင်းစဉ်တစ်ခုကို ကျောရိုးယူပြီး ဒါရိုက်တာ Sanjay Leela Bhansali က ရိုက်ကူးထားတာဖြစ်ပါတယ်။ ဂန်ဂူးဘိုင်ဟာဆိုရင် မွန်ဘိုင်းရဲ့ မြေအောက်လောကထဲမှာ မာဖီးယားဘုရင်မရယ်လို့ လူသိများပြီး ဂုဏ်သတင်း အင်မတန်ကြီးခဲ့တဲ့၊ တကယ်ရှိခဲ့ဖူးတဲ့အမျိုးသမီးတစ်ယောက်ပဲဖြစ်ပါတယ်ဗျ။ ဒီဇာတ်လမ်းကိုတော့ ဒါရိုက်တာက ရုပ်ရှင်ရသမြောက်စေဖို့အတွက် ဖြစ်ရပ်မှန်တွေကို အကြောင်းအရာ တချို့တစ်ဝက်ရောပြီး ပြည့်တန်ဆာတွေရဲ့ ဘဝတွေ၊ အခက်အခဲတွေ၊ ရုန်းကန်ရပုံတွေကို ထင်သာမြင်သာရှိအောင် ဒါရိုက်တာက ဖန်တီးပြထားပါတယ်။ ဇာတ်လိုက် ဇာတ်ကောင်ဖြစ်တဲ့ ဂန်ဂူးဘိုင်အဖြစ် မင်းသမီးချောလေး အာလီယားဘတ်က လုံးဝ အသက်ဝင်နေအောင် သရုပ်ဆောင်ထားပြီး Rating တွေ၊ Feedback တွေလည်း တော်တော်လေးကောင်းထားတာမလို့ ကြည့်ရတာ တကယ်တန်စေမယ့် ရုပ်ရှင်ကောင်းတစ်ခုပဲဖြစ်ပါတယ်ဗျ…။