Fall

ဒီတစ်ခါတော့ တလောကတင်ထွက်ထားပြီးတော့ IMDb rating 6.4 ရထားတဲ့ Fall ဆိုတဲ့ သည်းထိတ်ရင်ဖိုဇာတ်ကားကောင်းလေးကို ကြည့်လိုက်ကြရအောင်ပါရှင့်။ ဇာတ်လမ်းအကျဉ်းကို ညွှန်းပေးရရင်တော့ ဒန်းနဲ့ဘတ်ကီတို့ဟာ အရမ်းချစ်ကြတဲ့လင်မယားနှစ်ယောက်ပါ။ ဘတ်ကီ့မှာ ဟန်တာဆိုတဲ့ သူငယ်ချင်းတစ်ယောက်လည်းရှိပါတယ်။ သူတို့သုံးယောက်က တောင်တက်ဝါသနာပါသူတွေမလို့ သုံးယောက်သားအတူတူ တောင်တက်သွားလေ့သွားထရှိတယ်ပေါ့။ တစ်ရက်မှာတော့ မတော်တမှုတစ်ခုကြောင့် ဒန်းဟာ တောင်ပေါ်ကပြုတ်ကျပြီး သေဆုံးသွားခဲ့တယ်။ ဘတ်ကီကတော့ အဲဒီကတည်းက အရက်ပဲသောက်နေပါတော့တာပေါ့။ ဟန်တာကတော့ ခရီးတွေဆက်ထွက်နေတုန်းပါပဲ။ ဘတ်ကီ ခုလိုနေနေတာကို သဘောမကျတဲ့ ဘတ်ကီ့အဖေက ဟန်တာ့ကိုအကူအညီတောင်းလိုက်တဲ့အခါမှာတော့ ဟန်တာဟာ ဘတ်ကီ့ဆီပြန်လာပြီး အရင်လိုပြန်တက်ကြွလာအောင် ဘီ ၆၇ ဆိုတဲ့ ပေ ၂ဝဝဝ မြင့်မျှော်စင်ပေါ်ကို အတူတူတက်ကြမယ်လို့လာပြောပါတယ်။ အစကတော့မလိုက်ချင်ပေမဲ့ ဟန်တာရဲ့စကားကြောင့် သဘောတူပြီး လိုက်ဖြစ်သွားပါတယ်။ ဒါပေမဲ့ တက်ပြီးခါကျမှ လှေခါးဟာ ဆွေးလွန်းနေတဲ့အတွက် ပြုတ်ထွက်သွားတာမလို့ ပြန်ဆင်းလို့မရတော့ဘဲ မျှော်စင်ပေါ်မှာပိတ်မိသွားတဲ့အခါမှာတော့…။ ရိက္ခာကလည်းမပါ၊ အကူအညီကလည်း တောင်းမရတဲ့အခြေအနေမှာ သူတို့နှစ်ယောက်သား ဘယ်လိုလွတ်လမ်းရှာကြမလဲဆိုတာကို အမြင့်ကြောက်တတ်တဲ့သူတွေဆို အသည်းတယားယားနဲ့ကြည့်ရှုရမှာပါ။ ပြုတ်ကျတဲ့အခန်းတွေဆို ကိုယ်ပါပြုတ်ကျသလို လှိုက်ခနဲလှိုက်ခနဲပါပဲ။ အဓိကဇာတ်ကောင်နှစ်ယောက်တည်းနဲ့ ဇာတ်လမ်းတစ်ခုလုံးဆွဲခေါ်သွားတာ အတော်မိုက်ပါတယ်။ ကြည့်ရှုခံစားလိုက်ကြပါဦးရှင့်။