Enter the Fat Dragon

“ဟုန်ကျင်းပေါင်”ဆိုရင်တော့ ကွန်ဖူးကားတွေ၊ ဟောင်ကောင်ကားတွေ ကြည့်ဖူးတဲ့ ပရိသတ်တော်တော်များများက သိကြမှာပါ။ IP man 1,2 တို့၊ တရုတ်ခုန်ဆွသရဲကားတို့၊ ဂျက်ကီချန်းတို့၊ ဂျက်လီတို့ရဲ့ ဇာတ်ကားတွေ တော်တော်များများမှာ ပါဝင်သရုပ်ဆောင်ဖူးတဲ့ နာမည်ကြီး မင်းသားတစ်‌ယောက်ပါ။ “ဟုန်ကျင်းပေါင်”က အခုဆိုရင် အသက် ၇၀ တောင် ရှိနေပါပြီ။ ဒီဇာတ်ကားလေးကတော့ ဟာသကွန်ဖူးပုံစံ ဖြစ်ပြီးတော့ ၁၉၇၈ ခုနှစ်မှာ ရိုက်ကူးထား‌တာပါ။ ဇာတ်လမ်းလေး ထဲမှာ ကျေးလက်ဒေသမှာပဲ အဖေ့ခြံမှာ ဝက်တွေကို အစာကျွေးနေကျဖြစ်တဲ့ ဖက်တီးလေး တစ်ယောက် ရှိပါတယ်။ ဖက်တီးလေးက ဘရုစလီကို အရမ်းကြိုက်တော့ အိမ်မှာပဲ သူ့ဘာသာ ကွန်ဖူးတွေ လေ့ကျင့်နေခဲ့တာပါ။ တစ်ရက်ကျတော့ ဟောင်ကောင်မြို့မှာရှိတဲ့ သူ့ဦးလေး စားသောက်ဆိုင်မှာသွားကူဖို့ ဟောင်ကောင်ကို ရောက်သွားခဲ့ပါတယ်။ ထုံးစံအတိုင်းပဲ တောသားမြို့တက် ဆိုတော့အဆင်မပြေတာတွေဖြစ်၊ တောသားဖြစ်ပြီး လူကလည်း ဖက်တီးဆိုတော့ သူများ အထင်သေးတာတွေ ခံရတာပေါ့လေ။ ဒါပေမဲ့ သူက ဘယ်တော့မှ စိတ်ဓာတ်ကျသွားတာမျိုး မရှိဘဲနဲ့ အမြဲတမ်း အူတူတူ အတတ ပုံစံနဲ့ သူများ ကိစ္စတွေဆိုရင် လိုက်ကူညီနေကျပေါ့။ အလွဲလွဲ အချော်ချော်တွေနဲ့ တကယ် ရယ်ရတဲ့ဇာတ်ကားလေးမို့လို့ ဘယ်အချိန် ပြန်ကြည့်ကြည့် ရိုးတယ်ကို မရှိပါဘူး။ ဖက်တီးလေးနဲ့ ဟောင်ကောင်မြို့ကြီး ဘာတွေ ဆက်ဖြစ်ကြမလဲ ဆိုတာ သိချင်ရင် ဒီဇာတ်ကားလေးကိုပဲ ဝင်ရောက်ကြည့်ရှုလိုက်ကြပါဦးနော်။