Enola Holmes

အခု Enola Holmes ဇာတ်ကားက အခု ၂၀၂၀ စက်တင်ဘာလကမှ Netflix မှာ ပူပူနွေးနွေးထွက်ထားတဲ့ ကားလေးပဲဖြစ်ပါတယ်။ ဇာတ်ဆောင်တွေကိုတော့ အားလုံးနီးနီးသိကြမှာပါ။ နာမည်ကြီး Stranger things က မင်းသမီးလေး Millie Bobby Brown နဲ့အတူ အစ်ကိုနှစ်ယောက်အဖြစ် The witcher, Man of Steel, Mission impossible တို့ရဲ့ မင်းသား Henry Cavill ၊ The hunger game, Adrift, Me before you တို့ရဲ့ မင်းသားကြီး Sam Claflin တို့ပါဝင်ထားတာဖြစ်ပါတယ်။ နာမည်ကြီးမင်းသား မင်းသမီးတွေသာမက တက်သစ်စတွေပါ အတူတကွ အားဖြည့်ထားတဲ့ဇာတ်ကားလေးမို့ သေချာပေါက်ကြည့်ဖို့တိုက်တွန်းလိုက်ပါရစေ။ ဒီမှာ ဇာတ်ဆောင်ကတော့ ရှားလော့ခ်ဟုမ်း မဟုတ်ပါဘူး။ ညီမဖြစ်သူ အီနိုလာဟုမ်းကို ဇာတ်အိမ်တည်ပြီး သားအမိနှစ်ယောက် အတူတကွ ရှင်သန်လာပုံ၊ ဘဝကို ဖြတ်သန်းဖို့ အကြောင်းတရားတွေအပြင် ထိုခေတ်အခါက အင်္ဂလန်မှာ အမျိုးသမီးတွေ မဲပေးခွင့်ရရှိရေး အမျိုးသမီးဝါဒအတွက် တိုက်ပွဲဝင်တဲ့ပုံရိပ်တွေပါ ပါဝင် ထည့်သွင်းရိုက်ကူးထားပါတယ်။ အစ်ကိုနှစ်ယောက် အိမ်ကထွက်သွားပြီးတဲ့နောက်မှာ အဖေဖြစ်သူလည်း ဆုံးပါးသွားပါတယ်။ ကျန်ရစ်သူအမေက အငယ်ဆုံး သမီးကလေးကို ကျောင်းအိပ်ကျောင်းစားမလွတ်ဘဲ သူကိုယ်တိုင် ယောက်ျားများနည်းတူ ပညာစုံ သင်ပေးထားပါတယ်။ သမီးလေး ၁၆ နှစ်ပြည့် မွေးနေ့မှာတော့ အမေဟာ ပျောက်ခြင်းမလှ ပျောက်သွားပါတော့တယ်။ ညီမဖြစ်သူကို ‌စောင့်ရှောက်ဖို့ အစ်ကိုနှစ်ယောက် စံအိမ်ကို ပြန်ရောက်လာပေမယ့် အစ်ကိုကြီးရဲ့ ကျောင်း သွားဖို့ အတင်းအကြပ်တိုက်တွန်းမှုကြောင့် အီနိုလာတစ်ယောက် ကိုယ့်အားကိုယ်ကိုးပြီး အမေကိုလိုက်ရှာဖို့ ကြိုးစားပါတော့တယ်။ လန်ဒန်သွားတဲ့ ရထားပေါ်မှာ မထင်မှတ်ပဲ ကောင်လေးတစ်ယောက်ကို ဆုံရာမှ ထိုကောင်လေးရဲ့ တော်ဝင်မိသားစု ပြဿနာအမှုကို စိတ်ဝင်စားပြီး ကူညီဖြေရှင်းဖို့ ကြိုးစားပါတော့တယ်။ ဒါပေမယ့် တောနယ်မှာသာ ကြီးပြင်းလာခဲ့တဲ့ အီနိုလာတစ်ယောက် လန်ဒန်မြို့မှာရော အဆင်ပြေပါ့မလားဆိုတာ ရင်ခုန်စွာ စောင့်ကြည့်ရမှာပါ။ ထို့အတူပဲ အင်္ဂလန်ရဲ့ ၁၉ ရာစုမြင်ကွင်းတွေ အဖြစ်အပျက်တွေအပြင် လူနေမှုအဆင့်အတန်း ဝတ်စုံစတာတွေကိုပါ မြင်တွေ့ရမှာဖြစ်တဲ့အတွက် ဗဟုသုတလည်းရမယ့် ဇာတ်ကားကောင်းလေး တစ်ကားဖြစ်ပါတယ်