Emergency Declaration

ကိုရီးယားရုပ်ရှင်တွေကိုမှ အသည်းစွဲ ကြိုက်နှစ်သက်ကြတဲ့ movies ချစ်သူတွေအတွက် နာမည်ကျော် ဝါရင့်သရုပ်ဆောင် မင်းသားကြီးတွေ ပါဝင်ထားတဲ့ Emergency Declaration ဇာတ်ကားလေးကို မိတ်ဆက်ပေးပါမယ်။ ဒီဇာတ်ကားဟာ Thriller/Action အမျိုးအစားဖြစ်ပြီး IMDb rating 7 အထိ ရရှိထားကာ ယနေ့ခေတ် ကမ္ဘာကြီးမှာ ဖြစ်ပေါ်နေတဲ့ ရောဂါဆိုးကြီးလို ဗိုင်းရက်စ်ပေါက်ပွားလာတဲ့အကြောင်းကို ဇာတ်အိမ်တည်ရင်း မျိုးကွဲ ဗီဇ ပြောင်းလဲမှုကြောင့် လူသားတွေ ရင်ဆိုင်ကြုံတွေ့ရမဲ့ ဖြေရှင်းရခက်တဲ့ ပြဿနာအထွေထွေကို ရိုက်ကူးတင်ဆက် ထားပါတယ်။ လေယာဉ်ပေါ်က ခရီးသည်တွေရဲ့ ရင်ခုန်စိတ်လှုပ်ရှားစရာကောင်းတဲ့ ပျော်စရာခရီးစဉ်ဟာ လူတစ်ယောက်ရဲ့ ခြိမ်းခြောက် အကြမ်းဖက်မှုကြောင့် ရုတ်တရက်ဆိုသလို ထိတ်လန့်ကြောက်ရွံ့စရာကောင်းတဲ့ ခရီးစဉ်အဖြစ် ပြောင်းလဲသွားရပါတယ်၊ လေယာဉ်ပေါ်မှာ တစ်ကြိမ်တစ်ခါမှ မကြုံခဲ့ရဖူးတဲ့ အကြမ်းဖက်ခံရမှုကြီးကြောင့် ခရီးစဉ်တစ်လျှောက် အသက်ကို လောင်းကြေး ထပ်ထားရသလို မောင်းနှင်နေရတဲ့ လေယာဉ်မှူးတွေရဲ့ အခက်အခဲတွေကို နိုင်ငံရေး အရှုပ်အထွေးတွေနဲ့အတူ ကြည့်ရှုရမှာဖြစ်ပြီး ဒီဇီဝအကြမ်းဖက် လုပ်ရပ်ကြီးကို ကိုရီးယား နိုင်ငံရဲ့ အကြီးအကဲတွေက ဘယ်လိုဖြေရှင်းကြမလဲဆိုတာ ဇာတ်အိမ်ခိုင်တဲ့ ဒီကိုရီးယားဇာတ်ကားလေးထဲမှာ တွေ့မြင်ရမှာ ဖြစ်ပါတယ်။ ကိုယ့်လူမျိုး မဟုတ်ရင် ခေါင်းရှောင်တတ်ကြသလို၊ ကိုယ့်သွေးသားမဟုတ်ရင် မစာနာတတ်ကြတဲ့ အကြင်နာ တရားမဲ့တဲ့ လူသားမျိုးနွယ်တွေရဲ့ တစ်ကိုယ်ကောင်းဆန် ယုတ်မာရက်စက်မှုတွေ၊ မျှော်လင့်ချက်မဲ့သွားကြရတဲ့ လေယာဉ်မှူးနဲ့ ခရီးသည်တွေရဲ့ လူသားဆန်တဲ့ ဆုံးဖြတ်ချက် တွေကို သဘာဝကျကျ ရိုက်ကူးပုံဖော်ထားတဲ့ ဒီ Emergency Declaration ဇာတ်ကားလေးကို လက်မလွှတ်တမ်း ကြည့်ရှုလိုက်ကြဖို့ ရွှေပန်းသီးပရိသတ်ကြီးကို ညွှန်းပေးချင်ပါတယ်..