Dhokha: Round D Corner

အမှန်တရားဆိုတာ ဘာလဲ။ လူတိုင်း ယုံကြည်နေတာက အမှန်တရားလား။ လူတိုင်းလက်ခံထားတာက အမှန်တရားလား။ အမှန်နဲ့ အမှားကြားမှာ ရှိနေတဲ့ စည်းလေးက ဘယ်လောက်ထိ ပါးလဲ။ ဟက်ဂူးလ်ဆိုတဲ့ အကြမ်းဖက်သမားတစ်ယောက်ဟာ သူ့ကို ထောင်ထဲပို့နေတုန်း အချုပ်ကား ပေါ်မှာ ရဲလက်ထဲက သေနတ်ကို လုယူထွက်ပြေးပြီး တိုက်ခန်းတစ်ခုထဲဝင်ခိုကာ တိုက်ခန်းထဲက အမျိုးသမီးကို ဓားစာခံလုပ်၊ ပြန်ပေးဆွဲထားခဲ့ပါတယ်။ အဲ့ဒီအမျိုးသမီးနာမည်က ဆန်ချီဖြစ်ပြီး သူဟာ ခင်ပွန်းဖြစ်သူ ယတ်ထာ့သ်ကို ဖောက်ပြန်နေတယ်လို့ စွပ်စွဲကာ ကွာရှင်းဖို့ ကြိုးစားနေတဲ့သူဖြစ်ပါတယ်ဗျ။ ယတ်ထာ့သ်ကတော့ ဆန်ချီဟာ မရှိတာတွေကို အရှိလို့ မြင်နေတဲ့ စိတ်ဝေဒနာသည်ပါလို့ အားလုံးကို ကြေညာထားပြန်ပါတယ်။ ဓားစာခံဖြစ်သူ ဆန်ချီဟာ သူ့ကို ပြန်ပေးဆွဲထားတဲ့ ဟက်ဂူးလ်ကို ရင်ဖွင့်ရာကနေ တစ်ယောက်နဲ့တစ်ယောက် အမှန်တရားတွေဖလှယ်ရင်း အင်မတန်မှ ရှုပ်ထွေးပွေလီလှတဲ့ လေးပွင့်ဆိုင်ဇာတ်ထုပ်တစ်ခု ပေါ်ပေါက်လာပါတော့တယ်။ ဒီရုပ်ရှင်ရဲ့နာမည်က ဥပါယ်တံမျဉ်ပဲ ဖြစ်ပါတယ်ဗျ။ ဒီရုပ်ရှင်ထဲမှာ 3 idiots ထဲက ဖာဟန်အဖြစ် သရုပ်ဆောင်ခဲ့တဲ့ တောင်ပိုင်းမင်းသား အာရ်မန်ဒေဗန်က ဇာတ်ဆောင်တစ်ယောက်ဖြစ်တဲ့ ယတ်ထာ့သ်အနေနဲ့ ပါဝင်ထားပါတယ်။ တောင်ပိုင်းရုပ်ရှင်တွေနဲ့ ရင်းနှီးတဲ့သူတွေဆိုရင် သူ့ရဲ့ ရုပ်ရှင်တွေက မညံ့တာကို သိကြမှာပါဗျ။ ဇာတ်လိုက်မင်းသမီး ခူရှာလီကူးမားကလည်း underrated ဖြစ်တယ်လို့ပြောရလောက်အောင် အင်မတန်လှပြီး သရုပ်ဆောင်ကောင်းတဲ့အပြင် ဇာတ်လမ်းကလည်း မြှုပ်ကွက်တွေနဲ့ ဆွဲခေါ်သွားတာမလို့ အချိန်ပေးရတာ တကယ်တန်တဲ့ရုပ်ရှင်ပဲဖြစ်ပါတယ်။