Cuttputlli

သည်းထိတ်ရင်ဖို မှုခင်းရုပ်ရှင်ဒါရိုက်တာဖြစ်ချင်တဲ့အတွက် ၇ နှစ်လုံးလုံး ကွင်းဆက်လူသတ်သမားတွေအကြောင်း သုတေသနလုပ် လေ့လာ ထားတဲ့ အာဂျန်ဆက်သီဟာ အဆင်မပြေမှုတွေကြုံတွေ့ရပြီး အစ်မနဲ့ ယောက်ဖဖြစ်သူတို့ရဲ့တိုက်တွန်းချက်ကြောင့် အိပ်မက်ကို လက်လျှော့ကာ ရဲတပ်ဖွဲ့ထဲကို ဝင်ခဲ့ပါတယ်ဗျ။ တောင်တန်းတွေကြားမှာရှိနေတဲ့ သူတို့ရဲ့ မြို့လေးမှာ ဆယ်ကျော်သက်ကျောင်းသူတွေ တစ်ယောက်ပြီး တစ်ယောက် ပျောက်ဆုံးနေပါတယ်။ သူတို့ပျောက်သွားတိုင်းမှာ လူသတ်သမားက ပုံဆိုးပန်းဆိုးအရုပ်တစ်ခုရဲ့ ခေါင်းကိုထည့်ထားတဲ့ လက်ဆောင်ဘူး အစိမ်းရောင်လေးကို ချန်ထားခဲ့တတ်ပါတယ်ဗျ။ ကျောင်းသူတစ်ယောက် ပျောက်သွားပြီး နှစ်ရက်ကြာတိုင်း နှိပ်စက် သတ်ဖြတ်ခံထားရတဲ့ အဲ့ဒီကျောင်းသူရဲ့အလောင်းကို ပြန်ပြီးရှာတွေ့လေ့ရှိပါတယ်။ ဒုရဲအုပ်ဖြစ်လာတဲ့ အာဂျန်ဆက်သီဟာ သူလေ့လာထားတဲ့ အသိဉာဏ်တွေကို အသုံးချပြီး အခက်အခဲတွေကြားထဲကနေ ကျောင်းသူလေးတွေကို ဖမ်းဆီးသတ်ဖြတ်နေတဲ့ ကွင်းဆက်လူသတ်သမားကို ဖမ်းဖို့ ကြိုးစားပါတော့တယ်ဗျ။ ဒီ Cuttputlli ဆိုတဲ့ ၂၀၂၂ ထွက်ရုပ်ရှင်ဟာဆိုရင် ၂၀၁၈ တုန်းက ထွက်ရှိခဲ့တဲ့ တေလေဂူးရုပ်ရှင်ဖြစ်တဲ့ Ratsasan ဆိုတဲ့ မှုခင်းရုပ်ရှင်ကို ဟင်ဒီစကားပြောနဲ့ ပြန်ပြီး remake ရိုက်ကူးထားတာပဲဖြစ်ပါတယ်။ Ratsasan ကတော့ တေလေဂူးလို နတ်ဆိုးလို့ အဓိပ္ပါယ်ရပြီး Cuttputlli ကတော့ ဟင်ဒီလို ရုပ်သေးရုပ်လို့ အဓိပ္ပါယ်ရပါတယ်။ ဒီရုပ်ရှင်ရဲ့ အဓိကဇာတ်လိုက် ဒုရဲအုပ်အာဂျန်ဆက်သီနေရာမှာတော့ မင်းသားကြီး အရှေးကူးမားက သရုပ်ဆောင်ထားပါတယ်ဗျ။ မူရင်းဇာတ်လမ်းကိုက အချိုးအကွေ့တွေနဲ့ တော်တော်လေး ကြည့်လို့ကောင်းတာမလို့ Ratsasan မကြည့်ဖူးတဲ့သူတွေဆိုရင် ဒီ Cuttputlli ကို သဘောကျကြမှာ အသေအချာပါပဲ…။