
ဒီဇာတ်ကားလေးကတော့ လျှို့ဝှက်ဆန်းကြယ် သည်းထိတ်ရင်ဖိုဇာတ်အိမ်နဲ့ ဇာတ်ကားကောင်းလေးတစ်ကားပဲဖြစ်ပါတယ်။ ဇာတ်လမ်းလေးရဲ့အစမှာ ကိုရာလိုင်းဆိုတဲ့ကောင်မလေးတို့မိသားစုဟာ မိဘတွေရဲ့အလုပ်ကိစ္စကြောင့် တိတ်ဆိတ်ငြိမ်သက်တဲ့ အိမ်တစ်အိမ်ဆီ ပြောင်းရွှေ့လာခဲ့ကြတယ်။ ကိုရာလိုင်းရဲ့ အဖေနဲ့ အမေက အလုပ်တွေရှုပ်လွန်းနေကြတဲ့အတွက် သမီးဖြစ်သူကို ဂရုမစိုက်နိုင်သလိုဖြစ်နေတော့ အဆင်မပြေတဲ့မိသားစုလေးတစ်စုလို ဖြစ်နေခဲ့တာပေါ့။ တစ်နေ့မှာတော့ ကိုရာလိုင်းဟာ အဲ့ဒီအိမ်ကြီးထဲက မှော်တံခါးပေါက်သေးသေးလေးတစ်ခုကို တွေ့သွားတယ်။ ကိုရာလိုင်းဟာ အရာရာကိုစူးစမ်းတတ်ပြီး သတ္တိရှိတဲ့ကလေးမလေးတစ်ယောက်ဖြစ်တာကြောင့် အဲ့ဒီတံခါးပေါက်လေးထဲကိုဝင်သွားကြည့်လိုက်မိတဲ့အချိန်ကစပြီး မထင်မှတ်ထားတာတွေ စဖြစ်ပါတော့တယ်။ ဒီတော့ အဲ့ဒီတံခါးပေါက်သေးသေးလေးထဲမှာ ဘာတွေရှိနေမလဲ။ ကိုရာလိုင်းတစ်ယောက် ဘယ်လိုအန္တရာယ်တွေနဲ့ရင်ဆိုင်သွားရမလဲဆိုတာတွေကို စိတ်ဝင်စားဖွယ်ကြည့်ရှုခံစားရမှာဖြစ်ပြီးတော့ ဒီဇာတ်ကားလေးက မိဘနဲ့သားသမီးကြားက သဘောထားကွဲလွဲမှုတွေ ကလေးတွေရဲ့လိုအင်ဆန္ဒတွေကို ပေါ်လွင်အောင်ပြသထားတဲ့ ဇာတ်ကားလေးတစ်ကားပဲဖြစ်ပါတယ်။ ဆုတွေတော်တော်များများလည်း ရရှိခဲ့ဖူးတဲ့ဇာတ်ကားလေးဖြစ်တာကြောင့် အခုလို ပရိတ်သတ်ကြီးတို့အတွက် တင်ဆက်ပေးလိုက်ရခြင်းဖြစ်ပါတယ်။ ကြည့်ရှုအားပေးကြပါဦးနော်။