Beauty and the Beast

ဒီဇာတ်ကားလေးဟာလည်း Disney ရဲ့ princess line ထဲကတစ်ကားဖြစ်ပြီး အားလုံးပဲ ကလေးဘဝတုန်းကကြည့်ဖူးကြလိမ့်မှာပါ။ ဒီဇာတ်ကားလေးကကြာပြီဆိုပေမယ့် အခုအချိန်အခါထိ မရိုးနိုင်ဘဲ ကြည့်လို့ကောင်းနေဆဲဖြစ်မယ်လို့ ယုံကြည်ပါတယ်။ ဇာတ်လမ်းလေးရဲ့အစမှာတော့ နန်းတော်ကြီးတစ်ခုမှာ စံမြန်းနေထိုင်တဲ့ မင်းသားလေးတစ်ပါးဟာ အကျည်းတန်တဲ့အဘွားအိုကြီးတစ်ယောက်ကမ်းလှမ်းခဲ့တဲ့ နှင်းဆီပန်းကိုငြင်းဆန်ကာ အဘွားအိုအယောင်ဆောင်ထားတဲ့ နတ်သမီးရဲ့ရုပ်ရည်ကိုပဲကြည့်ပြီး အကြင်နာတရားကင်းမဲ့စွာ မောင်းထုတ်ခဲ့တဲ့အတွက်ကြောင့် နတ်သမီးရဲ့ကျိန်စာတိုက်ခြင်းခံလိုက်ရပြီး သတ္တဝါဆိုးကြီးတစ်ကောင်အသွင်ပြောင်းသွားပါတယ်။ မင်းသားလေးဟာ သူ့ရဲ့ ၂၁ နှစ်ပြည့်မွေးနေ့မတိုင်ခင် မိန်းကလေးတစ်ယောက်ကိုချစ်ကျွမ်းဝင်ပြီး အဲ့ဒီမိန်းကလေးကလည်း သူ့ကိုပြန်ချစ်မှသာလျှင် ကျိန်စာကပြယ်မှာဖြစ်ပြီးတော့ အဲ့လိုမဟုတ်ခဲ့ဘူးဆိုရင် တစ်သက်လုံး သတ္တဝါကြီးအသွင်နဲ့ပဲ နေထိုင်သွားရမှာပဲဖြစ်ပါတယ်။ ဘဲလ်ဆိုတဲ့ မိန်းကလေးဟာ ကျေးလက်ကဒေသလေးမှာနေထိုင်တဲ့ သာမန်မိန်းကလေးတစ်ယောက်ပါ။ ဘဲလ်ဟာ စာဖတ်ရတာကိုပဲကြိုက်ပြီး လူတွေနဲ့သိပ်ဆက်ဆံလေ့မရှိတဲ့အတွက်ကြောင့် အားလုံးက သူ့ကို လူရာမဝင်ဘူးဆိုပြီးထင်ကြတာပေါ့။ တစ်နေ့မှာ ဘဲလ်ရဲ့အဖေက သတ္တဝါကြီးရဲ့ရဲတိုက်ထဲကို လမ်းမှားရောက်လာပြီး အကျဉ်းချခြင်းကိုခံလိုက်ရပါတော့တယ်။ ပျောက်သွားတဲ့ဖခင်ကိုလိုက်ရှာရင်း ရဲတိုက်ကြီးဆီရောက်လာတဲ့ ဘဲလ်က သူနဲ့ သူ့ရဲ့အဖေကို အကျဉ်းသားနေရာလဲပေးဖို့ သတ္တဝါကြီးကိုတောင်းဆိုခဲ့တဲ့အတွက်ကြောင့် ဘဲလ်ဟာ ရဲတိုက်ထဲမှာပဲ တစ်သက်လုံးနေရပြီးတော့ အပြင်ကိုလည်းထွက်ခွင့်မရှိတော့ပါဘူး။ ဒီလိုနဲ့ နေ့ရက်တွေကျော်လွန်ရင်း ဘဲလ်ရဲ့ ကြင်နာတတ်တဲ့စိတ်ထားကြောင့် သတ္တဝါကြီး ဘယ်လိုတွေပြောင်းလဲသွားမလဲ။ ကျိန်စာကရော ပျက်ပြယ်နိုင်ပါ့မလား။ ဘဲလ်နဲ့ သတ္တဝါကြီးတို့ ဘယ်လိုအခက်အခဲတွေကိုရင်ဆိုင်ရမလဲဆိုတာကို ဆက်လက်ပြီးတော့ ကြည့်ရှုအားပေးရမှာပဲဖြစ်ပါတယ်။