Bachchhan Paandey

အရည်အချင်းရှိပေမယ့် အစွမ်းပြခွင့်မရသေးတဲ့ ဒါရိုက်တာမလေး မိုင်ရာဟာ သူ့ရဲ့ အရည်အချင်းကို ပြနိုင်ဖို့ အခွင့်အရေးရှာနေရင်း ဘတ်ချန်ပန်ဒေးဆိုတဲ့ ဒိတ်ဒိတ်ကြဲလူမိုက်ကြီးတစ်ယောက်ရဲ့ အတ္ထုပတ္တိကို ရုပ်ရှင်ရိုက်ဖို့ စိတ်ကူးရသွားခဲ့ပါတယ်။ ဘတ်ချန်ပန်ဒေးရဲ့ ဇာတ်ရုပ် ကတော့ ဉာဏ်ပြေးတယ်၊ လူသတ်ရတာလောက်ကို ခေါင်းထဲမထည့်ဘူး၊ သူ့အကြောင်းရေးတဲ့ သတင်းထောက်ကို ဓာတ်ဆီလောင်းပြီး မီးရှို့ပစ်တဲ့အထိရက်စက်တယ်။ မိုင်ရာဟာ ရုပ်ရှင်ရိုက်ဖို့အတွက် နယ်ခံသူငယ်ချင်းတစ်ယောက်ရဲ့ အကူအညီနဲ့ ဘတ်ချန့်ကို ချဥ်းကပ်ဖို့ ကြိုးစားရင်း အလွဲလွဲအချော်ချော်တွေ ဖြစ်ကုန်ပါတော့တယ်။ ဒီ Bachchhan Paandey ဆိုတဲ့ အက်ရှင်၊ ဟာသရုပ်ရှင်ဟာဆိုရင် Amazon Prime ကနေ လောလောလတ်လတ်ထွက်ရှိထားတာဖြစ်ပြီး ဘက်ဂျက်အနေနဲ့လည်း ရူပီး ၁၈၅ ကုဋေအထိ သုံးထားပါသေးတယ်။ အဓိကဇာတ်ကောင်တွေနေရာမှာတော့ မင်းသားကြီး အရှေးကူးမားနဲ့ မင်းသမီးချော ကရီသီဆန်နွန်တို့က သရုပ်ဆောင်ထားကြပါတယ်ဗျ။ IMDb rating အနေနဲ့ 7.6 ထိ ရရှိထားပြီး မင်းသားကြီးအရှေးကူးမားကလည်း ထုံးစံအတိုင်း ဇာတ်ရုပ်နဲ့လုံးဝ လိုက်ဖက်နေအောင် သရုပ်ဆောင်ထားပါသေးတယ်။ တစ်နယ်လုံး ဖိန့်ဖိန့်တုန်အောင်ကြောက်ကြရတဲ့ လူမိုက်ကြီးမှာ ဘာဇာတ်လမ်းတွေရှိခဲ့မလဲ၊ ဒါရိုက်တာမလေး မိုင်ရာကရော သူ့အရည်အချင်းကို ပြနိုင်ဖို့ ဘယ်လိုတွေကြိုးစားမှာလဲ၊ ဘတ်ချန်နဲ့ မိုင်ရာ ဘယ်လိုဆုံတွေ့ကြပြီး ဘာတွေဆက်ဖြစ်မှာလဲ ဆိုတာကို Bachchhan Paandey ဆိုတဲ့ ရုပ်ရှင်ကြီးထဲမှာ ဆက်ပြီးအဖြေရှာကြည့်ကြပါခင်ဗျ။