All Quiet on the Western Front

အခုတစ်ခါမှာတော့ သိပ်မကြာသေးခင်ကမှ Netflix ကထွက်ထားတဲ့ စစ်ကားလေးတစ်ကားနဲ့ မိတ်ဆက်ပေးချင်ပါတယ်။ All Quiet on the Western Front အမည်ရ ဇာတ်ကားလေးဖြစ်ပြီး IMDb rating အနေနဲ့ 7.8 တောင်ရရှိထားတာမို့ မြင့်တယ်ဆိုတာထက်ကို ပိုမြင့်လွန်းသွားပါပြီ။ စစ်ကားဆိုပေမဲ့လည်း စစ်ပွဲရဲ့ရလဒ်ဘာညာကို focus လုပ်ပြီး ရိုက်ပြထားတာမျိုးမဟုတ်ဘဲ ဒီစစ်ပွဲကြောင့်ဖြစ်လာတဲ့ အနိဋ္ဌာရုံတွေ၊ လူတွေရဲ့စိတ်ဒဏ်ရာတွေ၊ သေဆုံးသွားတဲ့အိပ်မက်တွေကို ဒရာမာဆန်ဆန်ရိုက်ပြထားတာဖြစ်ပါတယ်။ ဒရာမာဆိုလို့ ပျင်းစရာကောင်းနေမှာမျိုးမဟုတ်ဘဲ ကြည့်သူကိုတဖြည်းဖြည်းဆွဲခေါ်သွားပြီး ဇာတ်ကားပြီးတာနဲ့ ရင်ထဲကိုနင့်ပြီး စွဲကျန်စေမဲ့ကားလေးပါ။ အကျဉ်းညွှန်းရရင် (၁၉၁၄) ခုနှစ်မှာ ပထမကမ္ဘာစစ်စတင်ဖြစ်ပွားခဲ့တဲ့အတွက် ပေါလ်ဘော်မာအပါအဝင် ရဲသွေးကြွနေတဲ့ (၁၆) နှစ်အရွယ် ချာတိတ်လေးတစ်စုဟာ စစ်သင်တန်းဆင်းပြီး ရှေ့တန်းကိုလိုက်သွားကြပါတယ်။ သူတို့စိတ်ထဲမှာတော့ သူတို့မိဘနဲ့ ဖခင်မြေကို ဂုဏ်ယူရအောင်လုပ်မယ်ဆိုတဲ့ မျှော်လင့်ချက်တွေအပြည့်နဲ့ပေါ့။ ဒါပေမဲ့ တကယ်တမ်းရှေ့တန်းကိုရောက်ပြီး စစ်ဆိုတာဘာလဲ မျက်မြင်ကိုယ်တွေ့သိလာရချိန်၊ မျက်စိရှေ့မှာ ရဲဘော်တွေကျဆုံးသွားတာတောင် ဘာမှမလုပ်နိုင်ခဲ့ချိန်၊ အငတ်ငတ်အပြတ်ပြတ်ဖြစ်လာချိန်မှာတော့ လူလားတောင်မမြောက်သေးတဲ့ လူငယ်လေးတွေရင်ထဲမှာ မျှော်လင့်ချက်တွေအစား စိတ်ဒဏ်ရာတွေအစားထိုး ဝင်ရောက်လာပါတော့တယ်။ ဒီလိုနဲ့ပဲ “အိမ်ပြန်ရောက်ရင်… ” ဆိုတဲ့ တစ်ခုတည်းသော မရေမရာအိပ်မက်ကလေးကိုပဲ ဆုပ်ကိုင်ထားကြတဲ့လူငယ်လေးတွေ တကယ်ပဲအိမ်ပြန်နိုင်ခဲ့မှာလား၊ စစ်ကြောင့်ဘဝတွေ ဘယ်လောက်တောင်ပျက်စီးခဲ့ရလဲဆိုတာကို ဇာတ်ကားလေးကြည့်ရင်း တငြိမ့်ငြိမ့်ခံစားကြည့်ကြပါဦးနော်။