A Man Called Otto

ဟိုးရှေးရှေးတုန်းကနဲ့မစတဲ့ ပုံပြင်တစ်ပုဒ်ကတော့ ဇနီးသည်ဆုံးသွားပြီးနောက်မှာ move on မလုပ်နိုင်ဘဲ အဓိပ္ပါယ်မဲ့သွားတဲ့ဘဝကြီးကို အထီးကျန်ကျန်ဖြတ်သန်းနေရတဲ့ အော့တိုဆိုတဲ့အဘိုးကြီးတစ်ယောက်ရဲ့ နေ့စဉ်ဘဝနဲ့စပါတယ်။ အော့တိုအတွက်တော့ “မင်းမရှိရင်မဖြစ်ဘူး” ဆိုတဲ့စကားက အလိမ်အညာစကားမဟုတ်ခဲ့ပါဘူး။ သူ့အတွက်တော့ သူ့ဇနီးသည်ကသာ ရှင်သန်ခြင်းရဲ့အဓိပ္ပါယ်၊ သူ့ရဲ့အရာရာဖြစ်ခဲ့ပြီး ဇနီးသည်မရှိတော့တဲ့ သူ့ဘဝကြီးက ဗလာနတ္ထိပါပဲ။ ဒါကြောင့် ဇနီးသည်နောက်ကိုလိုက်ဖို့ ပြင်ဆင်နေတဲ့အချိန်မှာပဲ ဘေးအိမ်ကို အိမ်နီးချင်းအသစ်တွေပြောင်းလာခဲ့ပြီး သူ့ဘဝကလည်း ပြောင်းလဲသွားပါတော့တယ်။ ဒီဇာတ်ကားက အခု (၂၀၂၃) နှစ်စကမှ digital version ထွက်ရှိထားတဲ့ အသစ်စက်စက်ဇာတ်ကားတစ်ကားဖြစ်ပြီး IMDb rating 7.4 အထိရရှိထားတာမို့ ဝေဖန်ရေးဆရာတွေ စိတ်ကြိုက်တွေ့ခဲ့တဲ့ ဇာတ်ကားတစ်ကားလို့ ပြောလို့ရပါတယ်။ အဓိကဇာတ်ဆောင်အနေနဲ့ကလည်း Forrest Gump, The Terminal အဲဒီလိုဇာတ်ကားတွေမှာ ကျရာဇာတ်ရုပ်ကို ပီပီပြင်ပြင်သရုပ်ဆောင်နိုင်တာကြောင့် နာမည်ကြီးတဲ့ မင်းသားကြီး Tom Hanks က ပါဝင်သရုပ်ဆောင်ထားပါတယ်။ ဇာတ်ကားက အနိမ့်အမြင့်အတက်အကျတွေ အများကြီးမပါဘဲ အေးအေးငြိမ်ငြိမ်လေးနဲ့ လူတစ်ယောက်က နောက်ထပ်လူတစ်ယောက်ကိုချစ်တယ်ဆိုတာ ဒီဟာပါလားလို့ သဘောပေါက်သွားအောင် သေချာလေးရိုက်ပြသွားတာမျိုးပါ။ ဒါကြောင့် ချစ်ရတဲ့သူနဲ့ quality time ကုန်ဆုံးချင်တဲ့သူတွေဖြစ်ဖြစ်၊ ဘာမှလုပ်စရာမရှိလို့ စောင်ကိုက်ပြီးဒရာမာလေးကြည့်မဲ့ အက်ဖ်အေတွေအတွက်အဖြစ် အဆင်ပြေစေမဲ့ကားလေးပါလို့ ညွှန်းပါရစေခင်ဗျာ။