A Man and a Woman

A Man and A Woman ဆိုတဲ့ရုပ်ရှင်လေးကိုတော့ (Come Rain, Come Shine) ရုပ်ရှင်ကို ရိုက်ကူးခဲ့တဲ့ ဒါရိုက်တာ Lee Yoon-ki မှ ရိုက်ကူးတင်ဆက်ထားပြီး (The Shameless) ရုပ်ရှင်ထဲက မင်းသမီး Jeon Do-yeon နဲ့ (The Goblin) ဇာတ်လမ်းထဲမှ Gong Yoo တို့က ပါဝင်သရုပ်ဆောင်ထားပါတယ်။ ဇာတ်လမ်းလေးရဲ့ အကျဉ်းချုပ်ကတော့ ဆန်းမင် (Jeon Do-yeon ) ဟာ သူ့ရဲ့ စိတ်ဝေဒနာရှင်သားလေးကို ပညာသင်ပေးဖို့နဲ့ ဆေးကုသမှုခံယူဖို့အတွက် ဖင်လန်မှာရှိတဲ့ အထူးကျောင်းတစ်ကျောင်းကို တက်ရောက်ဖို့အတွက် ဖင်လန်မှာ ရှိနေခဲ့ပါတယ်။ တစ်နေ့မှာတော့ သူ့သားလေးနဲ့အတူတူ စခန်းချခရီးလိုက်သွားချင်ပေမဲ့ ကျောင်းကခွင့်မပြုတဲ့အချိန်မှာ သူ(မ)နဲ့အခြေအနေတူတဲ့ စိတ်ဓာတ်ကျရောဂါခံစားနေရတဲ့ သမီးလေးကို စခန်းချခရီးအတွက် လိုက်ပို့ပေးဖို့ ရောက်လာတဲ့ ကီဟုန်(Gong Yo)နဲ့ တွေ့ဆုံမိပြီး သူ(မ)ကို စခန်းချနေရာအနီးအနားအထိ လိုက်ပို့ပေးခဲ့ပါတယ်။ အပြန်ခရီးလမ်းမှာတော့ သူတို့တွေ နှင်းမုန်တိုင်းမိပြီး အိမ်မပြန်နိုင်ခဲ့ကြပါဘူး။ နောက်နေ့ ခွဲခွာရခါနီးမှာလည်း နှစ်ယောက်စလုံး တစ်ယောက်နာမည် တစ်ယောက် အသိမပေးဘဲနဲ့ ခွဲခွာဖို့ ဆုံးဖြတ်ခဲ့ကြပါတယ်။ ဒါပေမဲ့ ကံကြမ္မာကထူးဆန်းချင်တော့ ရှစ်လကြာပြီးနောက်ပိုင်းမှာ နှစ်ယောက်သား ကိုရီးယားမှာ ပြန်လည်တွေ့ဆုံဖို့ ဖြစ်လာပါတော့တယ်။ ဒီဇာတ်လမ်းလေးကတော့ လူနှစ်ဦးကြားက တားမြစ်ထားတဲ့ချစ်ခြင်းကို ရိုက်ကူးပုံဖော်ထားတာပါ။ အထီးကျန်ဆန်မှုတွေ၊ စောင့်ရှောက်ရမဲ့ တာဝန်ဝတ္တရားတွေကြားမှာ နှစ်ယောက်သား ကိုယ်ပိုင်ဘဝဆီပဲ ပြန်သွားကြမလား၊ သူတို့ပျော်ရွှင်မှုကိုပဲ ရွေးချယ်လိုက်ကြမလားဆိုတာကို စိတ်ဝင်စားဖွယ်ကြည့်ရှုလို့ရမဲ့ ဇာတ်လမ်းကောင်းလေးပဲဖြစ်ပါတယ်။