
ကျောင်းသား ရိုမန့်ကားလေးတွေကိုမှ သဘောကျပါတယ်ဆိုတဲ့သူတွေအတွက် Netflix က ဒီတစ်ခေါက်မှာ ပြသသွားတဲ့ ကားလေးကတော့ ၁၉၉၀ ခုနှစ် ဝန်းကျင်ရဲ့ နောက်ဆုံးနှစ်တစ်နှစ်ဖြစ်တဲ့ ၁၉၉၉ ခုနှစ်က အထက်တန်းကျောင်းသား ကျောင်းသူလေးဦးရဲ့ လေးပွင့်ဆိုင် ဇာတ်လမ်းလေးပဲဖြစ်ပါတယ်။ အနေအေးပြီး ရှက်တတ်တဲ့ကောင်လေး ဖွန်းဝန်းဟို၊ ဝန်းဟိုရဲ့ အခင်ဆုံးသူငယ်ချင်း ဘဲ့ဟျွန်းဂျင်၊ ပျော်တတ်ပြီး လွတ်လွတ်လပ်လပ်နေတတ်တဲ့ ကောင်မလေး နာဘိုရာ၊ ငယ်စဥ်ကတည်းက နှလုံးအားနည်းတတ်တဲ့ကောင်မလေး ဂင်ယွန်းဒူ။ အထက်တန်းကျောင်းမှာ ကြုံတွေ့တတ်တဲ့အတိုင်း ကျောင်းဖွင့်ခါနီးအချိန်မှာ သဘောကျရတဲ့ကောင်လေးကို တွေ့သွားတဲ့ ယွန်းဒူ…။ နှလုံးအားနည်းတာကြောင့် နိုင်ငံခြားမှာ ခွဲစိတ်မှုသွားလုပ်ရဖို့ရှိပေမဲ့ မသွားနိုင်ဖြစ်နေတဲ့ ယွန်းဒူကို ကူညီဖို့ သဘောကျနေတဲ့ကောင်လေး အကြောင်းစုံစမ်းပေးမယ်လို့ ကတိပေးခဲ့တဲ့ ဘိုရာ…။ ဘိုရာက ယွန်းဒူသိချင်နေတဲ့ ကောင်လေးအကြောင်း စုံစမ်းပြီး အောင်သွယ်ပေးနေပေမဲ့ တကယ်တမ်း လက်တွေ့မှာ ထင်ထားတဲ့အတိုင်း အဆင်ပြေနိုင်ပါ့မလား၊ သူငယ်ချင်းကို အောင်သွယ်ပေးနေတဲ့ ဘိုရာတစ်ယောက်ကော ရင်ခုန်ရတဲ့သူ ရှိလာနိုင်မလားဆိုတာ ဇာတ်လမ်းအေးအေးလေးနဲ့ လူတွေရဲ့စိတ်ကို ဆွဲဆောင်သွားနိုင်တဲ့ ဒီကားလေးက အခု ကြည့်ရှုနှုန်း အမြင့်ဆုံးနဲ့ စံချိန်တင်ထားတဲ့ ဇာတ်ကားလေးပဲဖြစ်ပါတယ်။